Mekr ü şeytanetde bî-adîl ve iğvâ ve ifsâd-ı nâsda sânî-i Azâzîl olup Prusya kralı Ağustos'un onbeşinde hâlik ve krallığına hemşîre-zâdesi mâlik olup hâlik-i mesfûrun Devlet-i aliyye'ye zâhir hâlde sadâkati nümâyân olup cânîşîni olan şahsın dahi taraf-ı devlete istimâle ve incizâbında vücûd-ı fâide melhûz olmağla binâberîn haber-i mezkûr vusûl buldukda Âsitâne-i saʿâdet'de mukīm olan maslahat-güzârı tarafına su'âl-i hâtır zemîninde dîvân tercümânı irsâl ve ol vechile lâzıme-i tatyîb ikmâl ve baʿdehû maslahatgüzâr-ı mersûm (287-b) resm üzere Bâbıâlî'ye gelüp bu husûsu mübeyyin tarafına vârid olan tahrîrâtı taraf-ı sadrü's-sudûra îsâl eyledi. Hâlik-i mesfûr derece-i semânîne vâsıl bir dâll u mudill olup Moskovlu ve Nemçelü ile birkaç defʿa harb ü kıtâle mübâşeret ve ekser evkātda nâil-i maksad-ı gālibiyyet olup memleketini tevsîʿ ve beyne'd-düvel sîtini terfîʿ eylediğinden gayrı fünûn-ı riyâziyede mahâreti ve sanâyiʿ-i harbiyyede kemâl-i şöhreti olup bu fünûna dâir vâfir te'lîfâtı olduğunu dahi nakl ve rivâyet ederler.