Sâbıkā Şam vâlisi Azm-zâde Vezîr Mehmed Paşa merhûmun imtidâd-ı vakt-i emâreti hasebiyle baʿde'l-vefât mîrîye olan deynini edâ edecek derecelerden efzûn mâl terk edeceği agleb-i ihtimâl iken muhallefâtı me'mûlden dûn ve baʿzı kimesnelerin sanduka-i kitmânında mahzûn olduğu melhûz ve maznûn olduğundan oğlu Abdullah Paşa ve akreb-i akrabâsından Nasuh Bey ve mukarreb etbâʿından birkaç kimse Âsitâne'ye ihzâr ve keyfiyyet kemâl-i teşdîd ve tazyîk ile istifsâr olundukda (287-a) vâkıf-ı hâl olmadıklarını bi'l-ittifâk beyân ve kelâmlarını eğerçi mü'ekkid bi'l-eymân etmişler idi. Ancak mûmâ-ileyhimâ süllem-i vezârete iʿtilâ etdikleri hâlde akall-i müddetde cânib-i mîrîye üçer bin kise edâ edeceklerini taʿahhüd eylediklerine bi- nâen be-vâsıtatü'ş-şufaʿâ niyâzları müsâʿade-i seniyyeye makrûn veyâ rütbe-i vâlâ-yi vezâret birer eyâlet ile memnûn olmuşlar idi. Nâil-i vezâret olalıdan berü geşt ü güzâr etdikleri mahallerde fukarâyı izrâr ve tecrîm ve müteʿahhid oldukları mâldan ancak Nasuh Paşa meblağ-ı kalîl teslîm edüp bundan sonra dahi müteʿahhid oldukları mâlı edâ edemeyeceklerinden gayrı mutasarrıf oldukları memâliki tahrîb ve zuʿafâ ve reʿâyâsını taʿzîb edecekleri zâhir olduğundan tuğları refʿ ve Abdullah Paşa Rodos'da ve Nasuh Paşa İstanköy'de ikāmet etmek bâbında emr-i ʿâlî şeref-sudûr ve kabz-ı mâllarına kapucubaşılar me'mûr oldu.