Dağıstan ahâlisinin geçen sene Tiflis eyâletine hücûmlarını Rusyalu Çıldır vâlisinin iğrâsına haml ile vâlî-i müşârün-ileyhin azl ve te'dîbini taleb ve Tiflis hâniyle miyânelerinde mü'esses olan uhûdu istihkāk-ı da'vâya illet ve sebeb ittihâz eylediklerinden gayri Tiflis hânını erkân-ı devletlerinden ve eyâletini zemâ'im-i memleketlerinden add ile vukūʿ bulan zarar hasâretini devletlerine â'id ve râciʿ bildiklerini ve müşârün-ileyhin te'dîbinde iğmâz Devlet-i aliyye nümûdâr olduğu takdîrde mukābeleten eyâlet-i Çıldır'a hücûm ve vazʿ-ı kadem-i şûm edeceklerini Rusya elçisi mükâlemelerin birinde hâlâ re'îsülküttâb olan Atâ'ullah Bey-efendi'ye telmîh ve mukaddemâ bu zemînde takrîr verdiklerini dahi tasrîh etmiş idi. Vezîr-i müşârün-ileyhin ve sâir hudûd u suğûr muhâfızlarının hilâf-ı şurût-ı muhâdene vazʿ u hareketleri vukūʿunda âharın sevk ve ilkāsına hâcet mess etmeksizin te'dîb ve mu'âheze-i anîfede Devlet-i aliyye kusûr etmeyeceği ve tâ'ifeteyn miyânlarında nizâʿ vü cidâl hâdis olmayup ahad-i hümâ âharın fetk ü isrile mukayyed ve esâs-ı bu'z ve udvân an-asıl beynlerinde müşeyyed olduğu ve Tiflis hânını Rusyalu'nun metbûʿ add etdikleri Devlet-i aliyye teslîmden âbî olup farzâ kemâl-i gurûr ve istikbârdan nâşî âharın memleketinde vukūʿ-yâfte olan fitneyi bahâne eyleyerek Çıldır eyâletine Rusyalu hücûm ederler ise Devlet-i aliyye dahi mukābele bi'l-misle ri'âyet edüp bu takdîrde zuhûr-ı nakz-i ahd (276-b) Rusya Devleti tarafından tahakkuk eyleyeceği ve silsile-i mümkinât tertîb-yâfte-i nizâm olaldan berü ihfâr-ı ahd ü zimmet ve nakz-i şurût-ı muhâdenet edenlerin avâkıb-ı ahvâlleri vahîm ve beyne'd-düvel devletleri ma'yûb ve zemîm olacağı cevabları ittifâk-ı ârâ-yı ehl-i şûrâ eğerçi meclis-i mükâlemede efendi-i müşârün-ileyh tarafından i'tâ olunup bu zemînde takrîr dahi verilmişidi. Ancak Rusyalu bir kavm-i mağrûr ve hîle ve hud'aları beyne'l-ümem müstefîz ve meşhûr olup memâlik-i Devlet-i aliyye'ye hırs u tamaʿları yevmen fe-yevmen tezâyüd üzere olmağla kuvve-i istidrâciyyelerine iğtirâren kāle getürdükleri hücûm maddesini fiʿle çıkarmak veyâhûd Dağıstan ahâlisini kavm-i tatar gibi ibtidâ-yı umûrda baʿzı mevâʿîd-i ebleh-firîb ile celb edüp ba'dehû dâr u diyâr ve zimâm-ı ihtiyârlarına mâlik olmak husûsları vâridât-ı hâtırdan ve tecrübesi sebkat etmiş umûrdan olduğuna binâen bu keyfiyyet ahâli-i Dağıstan'a tahrîrât-ı seniyye ile bu defʿa dahi ifâde ve kasd-ı istimâle ile hânân ve rü'esâya atâyâ ve inʿâmât-ı mülûkâne firistâde olunup vüzerâ-yı serhad dahi etrâf ve eknâfa takayyüd ve a'dâ-yı bed-peymân kasd-ı zarar u ziyân ile nümâyân olduğu hâlde mukābele ve müdâfaʿada izhâr-ı sebât ve tecellüd etmek üzere müceddeden me'mûr ve cümlesine ısdâr-ı menşûr kılındı.