Küçük Ali-oğlu'nun bundan akdem Payas kasabasından firârı ve Karbeyaz nâm mahalde karârı Daldaban-oğlu'nun sûret-i taʿahhüdü ve Haleb vâlîsi Vezîr Elhâc Mustafa Paşa'nın Payas'da ikāmet ile izhâr-ı sebât ve tecellüdü güzâreş-pezîr-i hâme-i beyân olmuşidi. Bu esnâda Şâm vâlîsi Cezzâr Ahmed Paşa tarafından baʿzı husûs ile Âsitâne'ye vârid olan çukadâr o havâlîden mürûr eylediğine binâen ve lede'l-istintāk Payas'da olan askerin teferrukunu ve Küçük Ali oğlu'nun gelüp ke'l-evvel Payas'da ikāmetini takrîr ve ihbâr ve derhâl bu keyfiyyet (265-a) kapudan paşa hazretlerine ifâde ve iş'âr ve mukaddemâ Payas'a taʻyîn ve tesyîr ve ba'dehû avk u te'hîr olunan sefîneleri kemâkân techîz ve tertîb ve bir kadem akdem zikr vâlisi Vezîr Timur Paşa sâir ta'yîn olunanlar ile müttefikan Payas'a varup şâkī-i mezbûru istîsâl ve hüccâc-ı hidâyet-minhâcı semt-i selâmete îsâl etmeğe me'mûr olup takviye-i bâzâ-yı iktidârı zımnında taraf-ı sadr-ı azamîden dört bin fındık altunu matiyye-i isti'câle tahmîl ve müşârün-ileyh tarafına tesbîl olunmuşidi. Ancak bu def'a ol tarafdan vürûd eden tahrîrat ve isticlâb olunan havâdisât çukadâr-ı merkūmun verdiği haberin ba'zısını cerh ve ba'zısını te'yîd edüp tafsîli bu ki şakī-i mezkûr ile Daldaban-oğlu beyninde fi'l-asıl habl-i karâbet münberim olmakdan nâşî Payas'dan firârını ba'zı karâin-i hâliye ile rü'esâ-yı asker Daldaban-oğlu'nun ta'lîmine isnâd ve bir def'a mûmâ-ileyhin Kilis tarafından zahîresi gelür iken hilâl-i tarîkde der-kemîn-i fırsat olan âdemleri zahîrenin bir mikdârını ahz ü zabt etmiş bulunduklarından beyne'l-ecnâd âvâze-i i'ânet ve imdâd bâlâ-rev-i seb'-i şidâd olmağla bu emr-i şâyi' vâki' ve gayr-i vâki' mûmâ-ileyhin rişte-i havfını mümtedd ve bâhusûs Âsitâne-i saʿâdet'den vürûduna müterakkıb olduğu ecnâdın te'ehhürü kuvve-i vâhimesini müştedd edüp serkeşân-ı tavk-ı inkıyâd (265-b) kāideleri üzere bilâ-izn ü ruhsat Kilis cânibine avdet ve bu nâ-ber-câ hareket sâir me'mûrlara dahi sirâyet edüp ez-cümle Beylanlı Abdurrahman Paşa askerini sefînelere vaz' ile leylen firâr ve hetk-i perde-i nâmûs u âr eylediği vezîr-i müşârün-ileyhin ma'lûmu oldukda gerek mûmâ-ileyhe gerek Daldaban-oğlu'na âdemler tesyîr ve avdetleri zımnında her ne kadar temhîd-i mukaddemât etdiyse netîce-pezîr-i te'sîr olmayup nâçâr etbâ'-ı mevcûdesiyle kasaba-i Payas'ı makarr ve zimâm-ı ihtiyârını teslîm-i dest-i kazâ vü kader eyledi. Çünki vezîr-i müşârün-ileyhin başında yüz bayrakdan ziyâde asker-i muvazzaf olup zahîre tedârükünün vech-i suhûleti dahi fi'l-asıl mûmâ-ileyhimânın ve ikdâmlarına münhasır idi. Bu kerre mecma'-i askerden gaybetleri zahîrenin inkıtā'ına sebeb-i âdî ve bâkī askerin tezelzül-i ikdâmlarına bâ'is ve bâdî olup fî-mâ-ba'd tedârük-i zahîreden me'yûs ve nevmîd ve bu hâl ile ikāmet muhâlif-i re'y-i sedîd olduğunu mülâhaza birle derhal Üzeyir beyi olan İmâm Ağa'yı üç yüz piyâde ile Payas muhâfazasına taʻyîn ve lâzım gelen altı bin guruş ulûfelerini ber-vech-i pîşîn teslîm edüp istikbâl-i hac ünvâniyle Adana'ya inân-tâb-ı isti'câl olduğu tahakkuk eylediğinden Timur Paşa tarafına gönderilen meblağın istirdâdı iktizâ ve müddet-i medîdeden berü sarf-ı nükūd ve vücûdiyle tâb ü tüvânı mefküd olan Haleb vâlisi müşârün-ileyh tarafına gönderilmesi ahrâ görülüp der akab bu iki (266-a) maslahatın tanzîmi içün Âsitâne'den ihrâc-ı berîd ve bir sevb-i semmûr zikr olunan atāyāya izâfe kılınarak ol havâlinin tasfiyesi ve hüccâc-ı bâ-ibtihâcın se- lâmetle imrâr olunmaları hususu tenbîh ve te'kîd olunduğundan gayri mukaddemâ Uzun İbrahim Paşa'ya tasmîm olunan Üzeyir ve Kurd-kulağı ve Payas muhâfazası el-yevm Adana mütesellimi olan Abdullah Bey'e bâ-rütbe-i mîrimîrânî tevcîh olundu. Sâniha: Daldaban-oğlu'nun ve Beylanlı Abdurrahman Paşa'nın sâbıka-i hâlleri zâhir ve an-asıl Devlet-i aliyye'ye itāʿatleri an-samîmü'l-kalb olmadığından gûn be-gûn muhâfaza-i nefs ile iştigālleri meşhûr ve mütevâtir olup binâen-alâ-zâlik bu defʿa Küçük Ali-oğlu'nun gāilesi ber-taraf oldukdan sonra nevbet kendülere gelmek mülâhazalarını der-yâd ve mecmaʿ ecnâddan bir takrîb müfârakat ve infirâd ile lâne-i tāir-i fesâd olan vilâyetlerine bâl-efşân-ı istiʿcâl olmağı bakā-yi nefslerine akvâ-yi vesîle add eylediklerinden birisi berren birisi bahren firâr ile tahkīk-i madde-i adem-i inkıyâd eylediler.