Cidde vâlisi Vezîr Mehmed Paşa'nın bundan akdem fevti haberi vürûd edüp Haleb vâlisi Vezîr Elhâc Mustafa Paşa'ya eğerçi mansıb-ı mezkûrun tevcîhi irâde buyurulmuş idi. Ancak vezîr-i müşârün-ileyh el-yevm Küçük Ali-oğlu üzerine me'mûr ve hasr u tazyîkine meşgûl bi-fazlihi teʿâlâ müddet-i kalîle zarfında şakī-i merkūmun istîsâliyle tarîk-i hüccâcın tasfiye olunması me'mûl olup hâl böyle iken mahall-i mezkûrdan müşârün-ileyhin tahrîk olunması bir zamândan berü ihtişâd üzere olan asâkirin inhilâl-i şîrâze-i cemʿiyyetlerine bâdî olacağı zâhir ve Azm-zâdelerden birine mansıb-ı mezkûr tevcîh olunmak lâzım gelse Şam vâlisinin tevahhuş ve teneffürü mütevâfir olacağı vâridât-ı havâtırdan olup bunlardan gayri Cidde'ye münâsib vâli mefkûd ve nâyâb ve bu fikr ile erkân-ı devlet gavta-hur-ı bahr-i iztirâb iken mâlikânesi olan Bolu'da bir zamândan berü mütemekkin ve an-asıl ricâl-i devlet beyninde müteʿayyin olan Elhâc Ahmed Ağa bu esnâda muhâsebe-i nefse ibtidâr ve dâm-gâh-ı erbâb-ı hevâ olan cihân-ı bî-bekānın adem-i istikrârını netîce-i efkâr eyleyerek bâkī ömrünü Mekke-i mükerreme ve Taybe-i tayyibe'de imrâr dâʿiyesine düşüp bu takrîb ile surre emânetine tâlib ve Âsitâne-i saʿâdet'e âyib olup talebini tasrîh ve surre emâneti birkaç gün mukaddem Zihneli [250-a] kapucu-başı Hasan Ağa'ya tevcîh ve sarf u tahvîli bir emr-i gayr-i vecîh olduğu tarafına telmîh ve mûmâ-ileyhin an-asıl garazı hasren cânib-i Hicâz'a azîmet olup surre emânetinin gayre ihâle olunması himmetine îrâs-ı fütûr etmediği maʿlûm oldukda Cidde'nin ağa-yı mûmâ-ileyhe bâ-rütbe-i vezâret tevcîh devâʿîsi sudûr-ı erkân-ı devletde muhtelic ve şevk-i mütezâyidine nazaran kendüsü dahi bu tasmîmden memnûn ve mübtehic olacağı melhûz olmağla der-akab kapuya da'vet ve Cidde mansıbı ile teklîf-i vezâret olundukda bilâ cevâiz ü avâid kabûl eyleyeceğini îmâ ve taraf-ı sadr-ı Felâtun-ârâdan keyfiyyet ma'rûz-ı hâk-i atabe-i kimyâ-âsâ buyurulup arz-ı âsafâneleri makrûn-ı müsâʿade-i hümâyûn ve şehr-i mezkûrun beşinci isneyn günü ağa-yı mûmâ-ileyh bâ-rütbe-i vâlâ-yı vezâret Cidde mansıbı ile memnûn ve husûl-i maksad-ı aslî ile re'sü'l-mâl meserreti efzûn oldu. Müşârün-ileyh öteden berü gars-ı yemîn-i devlet ve Tersâne-i âmire emâneti ve sâ'ir hidemât-ı cesîmede izhâr-ı lâzime-i sadâkat etmiş zevât-ı müteşahhısadan olduğundan gayri kâr-güzâr ve mücerribü'l-atvâr bir pîr-i sutûde atvâr olmağla hakkında bir inâyet-i mülûkiyyenin levha-tırâz-ı sünûh olması mûcib-i tahsîn-i nâs olmuşdur.