Sâbıkā kul kethüdâsı olup bundan akdem Özi muhâfazasında ağalık ile mukîm olan Sivâsî Mehmed Ağa'nın sadr-ı sâbık Alî Paşa hazretlerine Özi münâsebeti ile tereddüd ve intimâsı ve baʿde'z-zuhûrü's-sadâre miyânelerinde esâs ahd ü peymân müceddeden sâbit ve râsî olup müşârün-ileyh tarafından yeniçeri ağalığına sevk ü tergīb ve tarafına hufyeten berîd-i beşâret-nevîd baʿs u tesrîb olunmuşidi. Mûmâ-ileyh Özi'den geldiği gibi ağalık mesnedine suʿûd ve istiklâl-ı tâm ile isbât-ı vücûd edüp müşârün-ileyhin azlinden sonra necm-i ikbâli âfil olduğundan gayri beyne'l-enâm adem-i hıfz-ı lisân ve tamaʿı mezkûr ve kemâl-i rehâvet ü tesâmuhu meşhûr olup bu esbâb ile baʿzı mahallerde lusûs ve katlâ peydâ ve ehl-i ırz makūlelerinde adem-i râhat hüveydâ olmağla azli iktizâ ve şehr-i mezkûrun ikinci cumʿa günü ağalıktan azl olunup Bursa'ya iclâ ve kul kethüdâsı Yusuf Ağa yeniçeri ağalığıyla kâmrevâ kılınup bu takrîb ile ocak ricâli beyninde silsile vâkiʿ ve yoluyla herkes nâ'il-i eʿazz-ı merâtib ve mevâkiʿ oldu.