Gusn-ı devha-i saltanat ve gülbin-i hadîka-i devlet olan şehzâde Sultân Mustafa ebkāhu Allâh mâ dâmetü'd-dünyâ hazretleri bundan akdem taʿallüm-i Mushaf-ı şerîf'e mübâşeret ve suver-i furkāniyyeyi ahz ü kırâat ve bu esnâda tekmîli müyesser olup hatm duʿâsıyla mehâfil-i rûhâniyyâtı muʿattar kılmak irâdeleri derûn-ı ilhâm-meşhûn-ı hazret-i şehriyârîde cilve-ger olduğuna binâen işbu Cumâdel-ulânın gurre-i garrâsı olan perşembe günü sadr-ı müşterî-tedbîr ve şeyhülislâm-ı fazâil-semîr ve kapudan paşa-yı dilîr ve sadreyn-i muhteremeyn ve nakīb-ü-leşrâf ve Ayasofya şeyhi ve yeniçeri ağası ve defterdâr efendi ve ricâl-i bâb salât-ı zuhru Ayasofya câmiʿinde edâdan sonra Enderûn-ı hümâyûn'a azîmet ve Hırka-i şerîfe odasında dâmen-bûs-ı hazret-i zıllu'llâhî ile kesb-i behâ ve behcet ve işâret-i hümâyûn sudûru akabinde cümlesi zânû-zede-i edeb ve meskenet ve duʿâ-yı icâbet der-kafâ-yı hatm-ı şerîf itmâm olundukda şehzâde-i müşârün-ileyh hazretlerinin hâceleri imâm-ı evvel ve sânî ve Ayasofya şeyhi huzûr-ı mevâhib-mahsûr-ı (249-a) mülûkânede ferâce semmûr kürkler ile mazhar-ı eltâf ve baʿdehû cümle huzzâr ruhsat-yâfte-i izn ü insirâf oldular.