Sadriazam ve vezîr-i Hâtemiyyü'ş-şiyem Yusuf Paşa hazretleri (247-a) tarafına mukaddemâ müjde-i sadâreti mutazammın hatt-ı hümâyûn ile kapudan paşa hazretlerinin tatarlarından Hacı Mehmed nâm tatar irsâl olunup iki-üç gün sonra silâhdâr-ı hazret-i şehriyârî dahi muʿtâd üzere da'vet içün rû-be-râh azîmet olmuşidi. Müşârün-ileyh hazretlerine berîd-i beşâret vâsıl olduğu gibi emr-i hümâyûna imtisâl ve sebükbâr Mora'dan hareket ile i'dâd-ı matāyâ-yi isti'câl edüp katʿ-ı feyâfî ve tilâl eyleyerek Yenişehr'e karîb Baba nâm mahalde ağa-yi müşârün-ileyh hazretleri istikbâl ve kûze-i hâfızasına îdâʿ buyurulan vesâyâ-yi mülûkâneyi iblâğ ve îsâl akabinde şiddet-i şitâ ve kesret-i berf ü sermâya bakmayarak Mora'dan yevm-i hareketlerinin yirmibirinci günü Davud Paşa'ya vusûl ve istikbâl-i lâzıme-i şân ve hâlleri olan ricâl mahall-i mezkûrede huzûr-ı âsafânelerine duhûl ile dâmen-i devletlerini takbîl ve îkā-yi şerîta-i tevkīr ve tebcîl eylediler. Rumeli cânibinden makām-ı sadârete kādim olan vüzerâ-yı ʿizâm hazerâtı İncirli nâm çiftliğe gelüp ferdâsı Davud Paşa'da cüz'î ârâm ile yemeklik mahalli olan Bahariyyeye nüzûlleri eğerçi mutâd olup ancak sadriazam hazretlerinin bu kerre İncirli'yi geçüp defʿaten Davud Paşa'ya sâye-endâz-ı iclâl oldukları mahz-ı isâbet ve ayn-i kerâmet olup şu sebebden ki İncirli'de âdet üzere meks ü beytûtet lâzım gelse kıllet-i me'vâ ve şiddet-i sermâ hasebiyle dâire halkına ve müstakbelîn gürûhuna zahmet ve meşakkat târî olmak ihtimâlinden gayri ferdâsı Bahariyye'ye gelince elbise-i (247-b) âlây ile dâiye-i ihtişâmı iltizâm eden ehl-i rüsûm bürûdet-i hevâdan nâşî incimâd derecelerini kesb etmeleri emr-i meczûm idi. Davud Paşa'dan işbu şehr-i Rebîʿül-âhirin yirmidördüncü perşembe günü hareket ve mukaddemâ taraf-ı hümâyûndan mîrahor-ı evvel ağa maʿrifetiyle keşîde kılınan müzeyyen esb-i dil-keşe suvâr ve âheste-reftâr ile mahall-i muʿtadda kāimimakām hazretleri dahi vusûl bulup râkiben istikbâle mübâderet ve miyânelerinde sâbitü'l-asl olan hukūk-ı übüvvet ü nübüvvet iktizâsiyle yekdiğere izhâr-ı rûy-i beşâşet ve hem'nân-ı mürâfakat olarak yemeklik mahalline karîb mahalden kāimimakām paşa hazretleri müfârakat ve ilerüce esb-râh-ı azîmet ve sadriazam hazretleri dahi müteʿâkıben Bahariyye'ye pâ-nihâde-i feyz-i meymenet olup şeyhülislâm ve allâmetü'l-enâm hazretleriyle mülâkāt ve tarafeynden resm-i taʿzîm ve tevkīr-i mürâ'ât olunup ba'dehû ku'ûd ve ricâl-i devlet bi-ecmaʿihin takbîl-i dâmen-i devletleriyle nâil-i şeref-i nâ-ma'dûd oldular. Bundan sonra tenâvül-i etʿime gûnâ-gûn ve o hilâlde ricâl-i devlet avdete me'zûn olmalarına ba'de't-ta'am Şeyhülislâm efendi hazretleriyle sandala suvâr ve Yalı köşküne vusûlde tekrar Silâhdâr Ağa da'vete gelüp bu def'a dahi taraf-ı hümâyûndan keşîde kılınan müzeyyen râh-vâre rükûb ile hâkipây-i mülûkâneye cebîn-sây-i iftikâr olmalariyle tulû'-ı şemsden gurûbî-sâ'at ellibir dakîka mürûrunda müşârün-ileyh hazretlerinin yed-i kifâyetlerine teslîm-i mühr-i hümâyûn ve uhde-i sadâkatlerine tefvîz-i ahvâl ü şu'ûn kılındıkdan sonra yine bi'l-maʿiyye sarây-ı (248-a) âsafâneye kudûm ve Arz odası'nda lâzım geldiği vech üzere icrâ-yı rüsûm hilâlinde efendî-i müşârün-ileyh hazretlerine boğça ile arzı mu'tâd olan yeşile kaplu erkân semmûr kürk dahi dûrdan irâe ile ikmâl-i levâzım ri'âyet ve istînâs ve kāimimakām paşa hazretlerine dahi mu'tâd üzere serâsere kaplu semmûr ilbâs buyurulup ba'de't-tevdî' sadr-ı âlî-kadr hazretleri dîvân mahalline nüzûl ve umûm kaftanlarını iksâ ile ashâb-ı merâtib ve menâsıbı nâil-i e'azz-ı me'mûl eylediler. Cenâb-ı tertîb dihende-i ahvâl-i enâm ve nesak-sâzende-i hutūb-ı hass u âmm cellet zâtühu ani'l-evhâm hazretleri pâdişâh-ı adâlet-pîş ve şehinşâh-ı hayr-endîş hazretlerini mede'l-eyyâm serîr-i ârâ-yı şevket ve bahtiyârî ve bed-hâhân-ı devlet saltanatlarını erre-ber ser-i nâliş ü zârî edüp sadrıazam ve vekîl-i mutlak-ı muhteremlerini dahi rızâ-yı Hakk'a muvâfık ve irâde-i hüsrevâneye mutâbık a'mâl-i hayriyyeye muvâfık eyleye, âmîn.