Peder-i sa'îdü'l-me'âsir-i pâdişâh-ı devrân Gāzi Sultan Ahmed Hân sakāhu'l-lahü zülâlü'l-gufrân hazretlerinin himmet-i kûh-efgen-i mülûkâneleriyle bin yüz (241-a) otuzbeş târîhinde müceddeden binâ olunan bendlere mürûr-ı vakt ile vehn ve rahne târî ve müctemiʿ olan miyâh sûy-i diğere çekîde ve cârî olarak vakt-i hâcetde kıllet-i me'âlib-i teşne-gân-ı enâmın mûcib-i ıztırâb ve ıztırârı olmakdan nâşî bu zarar-ı âmmın defiyle bendlere ta'mîrine ve ale'l-husûs bend-i kebîr ve çiftehavuzlar üzerinde mebnî olan kusûr-ı bî-nazîr temâdî-i zamân ile hâne-i kalb-i âşık gibi vîrân ve rahne-gîr olup zikr olunan kâşânelerin dahi termîmine irâde-i hümâyûn ta'alluk etmekle derhâl çîre-destî-i mühendisân-ı asr ile sâlifü'l-beyân bend ve kasırların ta'mîr ve termîmine mübâşeret ve ihtimâm ve birkaç mâh zarfında itmâm olunup menbaʿ-ı cûybâr-ı cûd ü ihsân mevrid-i sevâkî-i birr ü imtinân olan pâdişâh-ı mekârim-ünvân bu vesîle-i cemîle ile mazhar-ı duʿâ-yı firâvân oldu. Zikr olunan bend ve kasırların taʿmîriyçün sâbıkā muhâsebe-i evvel Ali Râif Efendi'nin ve müderrisîn-i kirâmdan Münib Efendi'nin çekîde-i hâme-i irfânları olan tevârîh-i bedâyiʿ-nigâr sebt-i sahîfe-i âsâr kılındı. Sulandı ağzı râik-hâmenin cûş-i hurûşundan Olurken çaşnî-bahş-i selâset nazm-i garrâya Bu hayr-ı câriye mezc eyledim âb-ı hayât âsâ Selîs ü pâk iki târîh-i garrâ beyt-i yektâya Yekî sedd çekdi bak mâye Hamîd Hân-ı felek-mâye Su sızmaz bunda hâşâ ecr ile mâ-beyn-i icrâya Münibâ bende bir beyt ile yazdı iki ter-târîh Kitâş dikdi alup meydân Vehbî-i suhan-gûyî Güzel sedd yapdı Abdülhamîd bend eyledi suyu Su başıdır ki çekmiş bende bu sedd-i âb-ı dil-cûyî (241-b)