Doksansekiz târîhinde vefât eden Cafer Paşa'nın muhallefâtından olup mîrî içün zabt olunan sefâinden «Mürg-i Bahrî» nâmiyle müsemmâ otuzyedi zirâʿ fırkateyn sene-i sâbıka bahârında sâir süfün-i islâmiyye ile techîz olunup Akdeniz tarafına tesyîr olunmuşidi. Fırkateyn-i mezkûr Donanma-yi hümâyûn'dan dûr olup İstanköy verâsında vâkiʿ Amargos adası açığında fırtınaya tesâdüf ve süfün-i atîkadan olduğuna binâen tevâli-i telâtüm-i bahr-i mevvâc haşebden masnûʿ sûret-i esedînin bâlâda bulunan tarafını mahallinden fek ve ihrâc edüp hâline vâkıf baʿzı ricâl-i sefîne heykel-i esedin külliyyen katʿmı hâhân ve kapudan-ı mezkûr indifâʿ-ı zulmet-i leyl ve sükûn-ı rîh-i mûcibü'l-veyl akabinde mahalline vazʿını tasvîb ve istihsân akabinde heykel-i mezkûrun münfek olan tarafı bahre mümâs olarak taht-ı sefîneye vâsıl ve kuvvet-i mevc-i peyderpeyî ile sabâha dek sefîneyi döğüp darabât-ı mezkûreden derhâl sefînede fevâsıl hâsıl olup fürcelerden âb-ı deryâ sefîneye mülhak ve der-akab kapudan ve mülâzim ve neferâtın cümlesi bi-kazâillâhi teʿâlâ gark olup fakat güverte üzerinde olan köşk hey'et-i asliyyesiyle mahallinden münfek olup lâtmât-ı bahr ile sâhil-res-i necât ve derûnunda bulunan yedi-sekiz nefer kalyoncu bu vesîle ile vâreste-i kayd-ı memât oldular.