Sivâs vâlisi Vezîr Mikdâd Ahmed Paşa ile Çapan-oğlu beyninde nâr-ı adâvet-i mevrûse bu esnâda zebâne-keş-i iştiʿâl ve ahad-i hümâ âhar hakkında isnâd sû'-i hareket ve efʿâl ile dâ'iye-i icrâ-yı garaz ve nefsâniyyete iştigâl etdiklerinden gayrı vezîr-i müşârün ileyhin dâ'iresinde olan hademe ve etbâʿ emvâl-i fukarâya medd-i bâʿ ve bâ-husûs Çorum halkına îsâl-i gezend ü zarar etdikleri istimâʿ olunduğuna binâen Sivâs'dan refʿi iktizâ ve mâh-ı mezkûrun (231-a) onyedinci günü Diyârbekir Eyâleti müşârün-ileyhe ve Sivas Eyâleti Azm-zâde Vezîr Abdullah Paşa'ya tevcîh olunup huzûr-ı sadrıazamîde kapu kethüdâlarına hil'atler iksâ olundu.