Ağa-yı mûmâ-ileyhin rüşd ü reviyyeti zâhir ve idâre-i umûrda akl u dirâyeti gayr-i kāsir olduğu bi't-tecrübe maʿlûm-ı hüdâvend-i kerâmet mezâhir olduğundan gayri sadrıazam hazretleri ile dahi münâsebet-nâmesi olup bir nevʿ-i iltifât ile nâ'il-i hüsn-i mükâfât olması cây-gîr-i zamîr-i müşîrîleri idi. Bu esnâda ağa-yı mûmâ-ileyhin vakt-i tele'lü-i ikbâli rû-nümûd ve şâhid-i dil-keş-hirâm-ı merâmı cilve-ger-i âgûş-i şuhûd olup mâh-ı mezkûrun onyedinci çarşamba günü avâtıf-ı aliyye-i mülûkâneden müşârün-ileyhe Mora muhassıllığı ile rütbe-i vâlâ-yı vezâret ihsân ve seleflerine Bender muhâfazası tevcîh olunup bir an akdem Bender'e lühûku emr ü fermân olundu.