Müşârün-ileyh hazretleri mukaddemâ me'mûr-ı muhâfazası olduğu Özi kalʿasının mümkin mertebe nizâmını verdikden sonra hâkipâ-yi kimyâsâ-yi hazret-i hilâfet-penâhîye rû-mâl olmak şevkiyle matiyye-i istiʿcâle suvâr ve esnâ-yi râhda adl ü dâd izhâr eyleyerek der-i devlet-medâra takrîbi sâmiʿa-güzâr oldukda gıbta-fermâ-yi sebze-zâr-ı behişt olan Bahâriyye nâm nüzhet-sarây-ı dil-ârâmda nasb-ı hiyâm-ı zümrüd-fâm ve ihzâr-ı etʿime-i şehiyye ile icrâ-yi levâzım taʿzîm ve ikrâm kılınup işbu Cumâdel-âhirenin selhi isneyn günü zikr olunan yemeklik mahalline pâ-nihâde-i mecd ü devlet ve güzergâh-ı âsafânelerinde intizâr-ı selâm ile saf-beste-i kıyâm olan ricâl-i devlet-i ebed-müddeti tahrîk-i âb-rûy-i iltifât ile mâlik-nisâb-ı meserret (188-a) ve nüzhet-sarây-ı merkūmede vâkiʿ olan kasr-ı dil-ârâya nüzûl buyurduklarında iʿtâ-yi ruhsat-ı dâmen-bûs ile mûmâ-ileyhime iʿâde-i lütf-ı mürüvvet buyurdukdan sonra bast-ı hân-ı niʿam-ı gûnâ-gûn ve tenâvül-i mevâid-i iştihâ-efzûn resmi dahi itmâm olunup hâlâ revnak-bahş-i mesned-i iftâ ve mâlik-i ezimme-i fırka-i ulemâ semâhatlû efendi hazretleriyle sandal- suvâr-ı mürâfakat ve Sarây-i âmire'ye pâ-nihâde-i hayr u bereket olduklarında mukaddemâ müneccim başının ihtiyâr etdiği vakte terakkuben zânû-zede-i istirâhat oldular. Tulûʿ-ı şemsden dört sâʿat kırk dakīka mürûrundan ibâret olan vakt-i muhtâr hulûl ve huzûr-ı mevâhib-mahsûr-ı hazret-i şehriyârî ruhsat-ı duhûl husûlünde baʿzı vesâyâ-yı hazret-i hilâfet-penâhî müşârün-ileyh hazretlerinin mengûş-i gûş-i intibâhları buyuruldukdan sonra dest-i sadâkat-peyvestlerine kilîd-i dahme-i umûr-ı cumhûr olan mühr-i hümâyûn iʿtâ ve dûş-i hamiyyet-pûşlarına serâsere dûhte semmûr-i fâ'izü's-sürûr iksâ ve beyâz-ı subh-ı sâdıkdan masnûʿ bir câme-i sefîd-renk ve matbûʿa kaplu bir sevb-i semmûr-ı behcet-nüşûr ile şeyhülislâm efendi hazretleri dahi karîn-i iltifât-ı mülûkâne olup bi'l-maʿiyye me'zûn-ı insirâf u avdet ve muʿtâd olan âlây-i dilârâ (188-b) ile sarây-ı âsafâneye azîmet ve baʿde'l-vusûl Arz odası'nda resm-i âdîye riʿâyet olunup baʿdehû şeyhülislâm efendi hazretleri azîmete [rağbet] ve teheyyü' gösterdikde resm olan mahalle dek teşyîʿ-i âdî icrâ ve kā'im-makām paşa hazretlerine dahi edâ-yı hizmet kürkü iksâ olundukdan sonra dîvân mahallini teşrîf ve ricâl-i devlete ilbâs-ı âdet olan umûm hilʿatini ilbâs ile cümlesini taltīf buyurdular. Cenâb-ı vâhibü'l-âmâl حلت ذاته عن الشبيه والمثال hazretleri kudûm-ı meyâmîn-lüzûmlarını kâffe-i enâma mahz-ı birr ü nevâl edüp aʿmâl-i zâhire ve bâtına ve efʿâl-i bâhire ve kâminelerini rızâullaha muvâfık ve irâde-i pâdişâhîye mutâbık eyleye, âmîn.