Trablus-Şam Eyâleti bundan akdem Vezîr Mikdad Ahmed Paşa'ya tevcîh (186-b) ve mevsim-i hac takarrüb eylediğine binâen bir an akdem dâiresini tertîb ve tanzîm ile savb-ı maksûda luhûku mü'ekkeden tenbîh olunmuşidi. Müşârün-ileyhin pederleri Vezîr Ali Paşa'ya mîr-haclık husûsu bundan akdem kāle gelüp sâhib-vücûd oldukları dahi Şam tevcîh olunan Vezîr Cezzâr Ahmed Paşa'nın maʿlûmu olduğundan miyânede adem-i imtizâc hâletinin tekevvünü ve vahşet ve nefret sûretinin taʿayyünü mülâhazadan baʿîd olmayup eyâlet-i Trablus me'mûnü'l-gāile bir vezîre tevcîh olunmak münâsib olduğunu müteʿâkiben vürûd eden iʿtizâr-nâmelerinde beyân ve özr-i müveccehinin adem-i istihsâniyle rağbeten ve rehbeten istiʿcâlinde sarf-ı tâb u tüvân olunmuşidi. Müşârün-ileyh nâçâr ve muztarr olarak sâkin olduğu mahalden eğerçi hareket eylediğini işʿâr etmiş ancak aʿzâr-ı merkūmeyi tekrâr inhâ ve cerdeciliği muvâfık-ı vakt ü hâl olmadığını inbâ edüp hattâ bu mazmûnda kāimimakām-ı âlî-makām hazretleri tarafına dahi feryâd-nâme isrâ etmişidi. Üzerinden Trablus'un sarf u tahvîli şimdilik müteʿassir ve düşvâr ve fakat bu senelik semt-i müdârâya zehâb ile îfâ-yı hizmet-i lâzımeye ibtidâr etmesi zımnında kāimimakām paşa hazretleri tarafımdan tesliyet-nâme tahrîr ve tisyâr olunmuşiken bağteten beyaz üzerine keşîde bir kıtʿa hatt-ı hümâyûn şeref-rîz-i (187-a) sudûr ve mazmûn-ı ilhâm-meşhûnda Trablus-Şam Eyâleti Cezzâr Paşa müteʿallikātından birine verilmeyüp Mikdad Paşa'ya verilmesi eğerçi re'y-i hasen olup ancak adem-i imtizâcları dahi melhûz olmağla tarîk-i hacda bir hâdise zuhûr etmemek içün âhar bir ki- mesnenin cerde nasb olunması ve Azm-zâdelerde mahzûr-ı mezkûr der-kâr ve Cezzâr'ın müteʿallikātına verilmekde dahi mazarrat bedîdâr olmağla hîn-i tercîhde bunların istisnâ olunmaları derc ü tastîr buyurulmuş Mikdâd Paşa'nın bir birini müteʿâkib vürûd eden tahrîrâtında bast olunan aʿzâr ve îrâdât gayr-i vâhî olduğuna binâen me'mûrları ıztırâb-ı ihâta edüp o hâlde iken zikr olunan hatt-ı hümâyûnun zuhûru kerâmet-i zâhire ve irhâsat-ı bâhire kabîlinden olduğu zâhirdir. Anadolu'da umûr-ı cerdeyi kemâ-hüve-hakka idâreye kādirdir. Vüzerânın fıkdânı ve kime teklif olunmak lâzım gelse taraf-ı mîrîden küllî meblağ talebinde olacağı kâr-fermâyân-ı devletin mütebâdir-i ezhânı olup ancak Azm-zâdelerden birkaç seneden berü tarîk-i hacda delîl-başıları olup urbân ve sâir ahâli ile hüsn-i imtizâc ve ihtilâtı mesmûʿ ve zâtında şecâʿat ve celâdet mevdûʿ olan İbrâhîm Ağa mîrimîrânlık ile bilâ-iʿânet umûr-ı cerdeyi taʿahhüd ve iltizâm ve an-asıl (187-b) Cezzâr Ahmed Paşa dahi tarafına müteveccih olup bu sûretden mahzûz olacağını ifâde ve ifhâm edüp menzil ile sebük-bâr azîmet edeceği mübârek-rikâb-ı kâmyâb-ı hüsrevâneye arz olundukda tevcîhi tasvîb ve işbu Cumâdel-âhirenin yirmibeşinci perşembe günü şeref-yâfte-i sudûr olan hatt-ı hümâyûn mûcibince bâ-rütbe-i mîrimîrânî Cerde başbuğluğu ile eyâlet-i Trablus zikr olunan İbrâhîm Ağa'ya tevcîh ve ihsân olunundu.