Müşârün-ileyhin sadâretden infisâli vaktinde hazînesinde müddehir ve mevcûd ve ber-vech-i emânet baʿzı mahallerde vazʿ etdiği altı yüz kiseye karîb nukūd ve sâir eşyâ ve emvâli cânib-i mîrîden zabt olunup îrâdına henüz müdâhale olunmamış idi. Birkaç günden sonra hırs u tamaʿa dâir baʿzı ahvâl ve âsârı resîde-i sâmiʿa-i hazret-i şehriyârî olmağla hakkında zuhûr eden tagayyür-i maʿnın tezâyüdüne illet olup fakat sadâreti hengâmında ber-vech-i suhûlet mâlik olduğu mukātaʿât uhdesinden ifrâz u ihrâc ve tâliblerine fürûht ile hâsıl (180-b) olan mebâliğ-i vefîresi Hazîne-i âmire'ye îsâl ve idrâc olunduğundan gayri mukātaʿât-ı mîrîyyeden külliyyetlüce fâiz ile meşhûr Karaburun mukātaʿasınm nısfı Kassab-başı-zâde mahlûlünden bilâ-muʿaccele tarafına temlîk ve nısf-ı âharı Behcet-zâde kasr-ı yedinden alınup mukātaʿayı vâreste-i kayd-ı şerîk eyledikden sonra mukaddemâ tertîb etdiği vakfına tashîh etmişidi. Bu makūle mukātaʿât-ı mîriyyenin bilâ-muʿaccele ahz ü tasarrufu kāʿide ve şurûtun hilâfı ve vakfa tashîh olunan mukātaʿâtın min-baʿd fürûhtu mümkin olmayup tedavül-i eyâdî-i nâs ile husûlü melhûz ve meşhûd olan menâfiʿ-i mîrîyyeye bâʿis-i tenâfî ve ale'l-husûs müşârün-ileyhin tanzîm etdiği vakfın musakkafâtı taʿyîn olunan vezâife kâfî ve vâfî olmağla mücerred cânib-i mîrîyi sıyânet ve zikr olunan nizâm-ı mü'essesi vi- kāyet kasdiyle mukātaʿa-i mezkûre vakf-ı mezbûrdan ifrâz ü intizâʿ ve hey'et-i ulâsma iʿâde ve ircâʿ ile müceddeden mezâda verilüp ragabât-ı nâs inkıtāʿından sonra tāliblerine beyʿ ve tevcîh olundu. (181-a)