Sadrıazam-ı müşârün-ileyh hazretleri ikibuçuk seneye karîb mühr-i hümâyûnu hâmil ve bu esnâda kevkeb-i rahşân-ı ikbâli âfil olup ayn-i iʿtibâr-ı mülûkâneden sâkıt ve evc-i rifʿatden hazîz-i tenezzüle hâbit olduğuna binâen işbu Cumâdel-ulânın yirminci perşembe günü mîrahor-ı evvel Abdî Bey vâsıtasıyla müşârün-ileyhden mühr-i hümâyûn ahz olunup Balıkhâne'ye îsâl ve birkaç sâʿat mürûrunda bi-tarîki'n-nefy Gelibolu cânibine irsâl ve sadrıazam hazretleri gelinceye dek vâkiʿ olan umûr-ı Devlet-i aliyye'yi rü'yet etmek bâbında hâlâ kapudan-ı deryâ olan Vezîr Gāzî Hasan Paşa kāimimakām nasbiyle ibcâl olunup müşârün-ileyhin sebeb-i azli maʿlûm olmak içün şeref-yâfte-i sudûr olan hatt-ı hümâyûn-ı mehâbet-makrûnun sûreti işbu mahalle sebt olundu.