Memâlik-i Hindiyyenin aksâ-yı akālîm-i berriyyesinden Bahr-i muhît-i Hind'de Seylan cezîresi mukābilinde vâkiʿ Melibar ikliminde hâkime olan Bibi Sultan tarafından bu defʿa Âsitâne-i saʿâdet'e tahrîrât vürûd edüp mazmûnunda Melibâr bilâdında Şekrut Fermas nâmında bir melik-i hûş-mend olup bi'set-i hazret-i fahrü'l-mürselînden mukaddem muʿcize-i inşikāk-ı kamerî vâkıʿasında rü'yet ve envâr-ı sâtıʿa-i nübüvvet münteşir-i çâr-cihet (168-b) olduğu hînde nefsini çirk-i şirkden tathîre niyyet edüp Mekke-i mükerreme'ye vusûl ve huzûr-ı risâlet-penâhîde kıyâm u müsûl ve dâ'ire-i fâhire-i İslâma duhûl akabinde memleketine avdet ve esnâ-yı râhda vâkiʿ olup bilâd-ı Arabda Zıfar nâm memleketde âzim-i dâr-ı âhiret olup el'ân hâkime-i Melibâr olan Bibi Sultan zikr olunan melikin akrabâ ve veresesinden olup ol havâlide olan ehl-i İslâma hâkim ve bu âna gelince memleket ü hükümet ve emr-i diyânet ve şerîʿatleri tagayyür ü tebeddülden sâlim iken doksanyedi senesinde abede-i nâr olan küffâr üzerlerine gelüp bir sene kadar miyânelerinde ceng ü peykâr der-kâr ve avn-i hazret-i kahhâr ile zümre-i muvahhidîn mansûr ve muzaffer ve küffâr-ı mecûs makhûr ve müdemmer ve memleketleri musahhar oldukdan bir sene sonra kefere-i mesfûre İngilizlü'den intisâr ve ittihâdları kuvvetlerine medâr olarak müslimîn üzerine muhâceme ve âğâz-ı muhârebe ve müsâdeme etmeleriyle tarafeynden halk-ı kesîr telef ve zâyiʿ ve zümre-i muvahhidîne isâbet-i ayn vâkiʿ olup bir kalʿa-i kebîreyi küffâr zabt u istishâb ve derûnunda olan ehl-i İslâma âmân iʿtâsından sonra nakz-ı ahdi irtikâb ve emvâl-ı nâsı intihâb ve sâ'ir husûne itâle-i iyâdî-i hırs u âz ve ekserîni zabt ile îkāʿ-ı kâr-ı nâ-sâz eylediklerinden gayri hâkime-i müşârün-ileyhâyı birkaç gün kalʿa-bend ve kâffe-i emvâli nehb olunmuşiken vâfir şey talebiyle izʿâc ve derd-mend eyledikleri ve el'ân İngilizlü'nün taht-ı tagallüb ve zîr-i hükümet ve tasallutlarında muhân ve recâmend-i avn-i hazret-i sübhân ve hâstekâr-ı meded-i devlet-i ebed-bünyân oldukları ve ezmân-ı sâlifede mülûk-ı Melibâr aʿdâ-yı dînden rencîde ve dil-âzâr (169-a) olduklarında Devlet-i aliyye'den istimdâd ve Devlet-i aliyye dahi iʿânet ve imdâd ede-geldikleri mesbûk olup hattâ Sultan Murâd aleyhi rahmeten Rabbü'l-ibâd hazretleri vaktinde olan imdâd sebebiyle küffâra gâlib ve el'ân sâbıkı misillû imdâd-ı halîfe-i rû-yı zemîn ve iʿânet-i pâdişâh-ı İskender temkîne tâlib olduklarından gayri İngiliz kralına keyfiyyet cânib-i saltanat-ı aliyyeden mahsûs tahrîr ve Melibâr ikliminden İngilizlü'nün ahz eyledikleri husûn u kılâʿ ve emlâk u zıyâʿı ve hüccâc-ı Hindî nakl içün iʿdâd olunup bu defʿa mesfûrların mazbûtu olan sefâ'in istirdâd olunmak tazarruʿâtı derc ü tastîr olunmuş Melibâr iklîmi hâkimesi olan müşârün-ileyhâ Sultan Ali Raca'nın hemşîresi olup karındaşının vefâtında makāmına câlis ve memleket-i mezkûrede bulunan ahâlî kudûmiyle müste'nis olup gerek birâderinin hayâtında ve gerek müşârün-ileyhânın vaktinde İngilizlü'den şi- kâyet-nâmeleri vârid oldukda bir kaç kıt‘a top ve vech-i âhar ile mukaddemâ i'ânet olunmuşidi. Ancak Melibar ülkesi minvâl-i muharrer üzere Seylan cezîresi mukābilinde vâki‘ bir memleket olup memâlik-i mahrûse-i pâdişâhî ile Melibar bilâdı beyninde memâlik-i Acem ve memâlik-i Hind misillû katı çok hâkim-i mutasaltın ve müstakillîn memleketleri olduğundan gayri memleket-i mezbûre bahr-i Süveyş hâricinde bahr-i Muhît Yemen ve Acem ve Hind gibi bihâr-ı azîmenin mâverâsında olduğu ma'lûm olmakdan nâşî taraf-ı saltanat-ı seniyyeden kendülere bahrî ve berrî i'ânetin imkân-ı âdîsi olmadığı zâhir ve Seydi Ali kapudan ol tarafa azîmeti esnâsında henüz Hürmüz (169-b) boğazından çıkar-çıkmaz ne vartalara giriftâr olduğu mesbût-ı butûn defâtir-i vekāyi‘ olduğundan gayri İngiliz elçisine keyfiyyet-i mezkûrenin ifâdesinde dahi vakt ü hâl iktizâsına göre fâide melhûz olmayup şimdilik alâ-hâlihi terk olunmak gerçi ehven olup ancak hâkime-i müşârün-ileyhâ ehl-i islâmdan olup Devlet-i aliyye'den temennî-i avn ü nusret eylediğine binâen recâsına adem-i müsâ‘ade mugāyir-i rüsûm-ı cihândârî ve münâfî-i levâzım-ı mürüvvet ve gayretkârî olduğu zâhir olmağla lâ-cerem imdâdın imkânı var mıdır? deyû o havâlinin keyfiyyet ve ahvâline tâmmü'l-vukūf olan Bağdad ve Basra vâlisine makām-ı sadâretden mufassal kāime tahrîr olundu.