Zikr olunan aşâ'irin öteden berü ricâl ü ebtâli ferâvân ve esbâb-ı sâ- mân ve cemʿiyyetleri mükemmel ve gayr-i noksan olup bu refâhiyyet-i hâl merkūmları girîve-gerd-i semt-i tuğyân ve vülât ve voyvodalarına inkiyâddan rû-gerdân etdiğine binâen sayf ü şitâda vâdi-i gavâyet ve şekāvete pâ-nihâde ve ebnâ-i sebîli giriftâr-ı dâm-ı intihâb ve reʿâyâ ve zîr-destânın (156-b) emâlini iğtisâb ve katı çok nüfûs itlâf ve ızaʿa ve tüccâr ve sevda-gerânın yollarını katʿ ile cevr ü zulmlerin aktâr-ı arza izâʿa eylediklerinden gayri üzerlerine edâsı lâzım gelen mâl-i mîrîlerini edâda mümâtele ve ınâd ve verdikleri sûretde dahi mızrak uciyle cüz'î şey teklifini iʿtiyâd ve ale'l-husûs mukaddemâ bir azîm İzmir kerbânını târâc ve Bağdad kadısını katl ile tekmîl-i tarîk istidrâc etmişler idi. Aşâir-i mezkûre bu hâl üzere terk olunduğu hâlde şâmilü'l-etrâf olan cevr ü iʿtisâfları memleket-i Anadolu'yu tahrîb ve nebş-i izâr ve taʿaddîleri zuʿafâ ve berâyâyı ızrâr ve taʿzîb eyleyeceği zâhir olmağla te'dîb ve gûşmâlleri ve el-yevm içlerinde mevcûd olup zikr olunan şekāvet ve hasârete cesaret eden maʿlûmü'l-esâmi eşhâsın ahz ü istîsâlleri ve fî-mâ-baʿd bir mahall-i maʿlûmda iskânlariyle bir râbıta-i kaviyye tahtına idhâlleri cezmen ve katʿen matlûb-i hazret-i hilâfet-penâhî olduğuna binâen Anadolu'da vâkiʿ vüzerâ-i izâm ve mîrimîrân-ı kirâmın ekseri bu irâde-i sâmiyenin temşiyetine me'mûr ve her birine başka başka ısdâr-ı menşûr kılınmışidi. Aşâir-i mezkûre hâlâ Rakka vâlisi Vezîr Abdi Paşa ve Rişvân-zâde mîrimîrân Ömer Paşa maʿrifetleriyle Urban ovası demekle meşhûr olan mahalde ihâta ve tazyîk ve memerr ü maʿberleri seddiyle pelâs-pâre iktidar ve ru'ûnetleri temzîk olunup ıztırâb-ı tâmlarından nâşî heyet-i mecmûʿalariyle istislâm ve istîmân ve tahlîs-i cân sevdasiyle taleb-i avf u ihsân etmeleriyle fî-mâ-baʿd hadlerini tecavüzden hazer ve ebnâ-yi sebîl ve fukarâ ve zuʿafâya adem-i îsâl-i gezend ü zarar ile bir mahalde iskânı kabûl edüp (157-a) derûnlarmda olan elli nefer mikdârı eşkıyâyı iʿtā ve zimmetlerinde olan doksansekiz senesi mîrîsini mâlikâne mutasarrıfı olan Rişvan-zâde Ömer Paşa'ya teslîm ü edâ ve nehb eyledikleri İzmir kerbânmın emval-i kesîrelerine bedel olmak üzere canib-i mîrîye bin beş yüz kise akçe vermek şurûtiyle istîmânları karîn-i hayyiz-i iʿtibâr ve kabûl ve bu şurûtun birinden nükûl etmemeleriyçün nezr-i girâne katʿ olundukları müşârün-ileyh tarafından inhâ ve taʿahhüd olunan emvâlden oymakların hisselerine isabet eden mâl tefrîk olunduğuna binâen tahsîli içün ve akçeye bedel verecekleri hayvanât ve eşyânın revâcı olan mahallerde fürûht ve iştirâsiyçün vulât-ı etrâfa evâmir-i şerîfe istidʿâ olunmağla evâmir-i mezkûre ısdâr ve tisyâr olunup aşair-i mezkûrenin fî-mâ-baʿd iktizâ eden nizamları ve iskân olunacakları mahallin taʿyîni ve müşârün-ileyhe ve maʿiyyetinde olan mîrimîrân ve sair me'mûrlara ikramiye nâmiyle verilüp bu defʿa taraflarından istîzân olununan ikiyüz ki- se akçenin ahz ü iğtinâm ve beynlerinde iktisâmı içün diğer emr-i âlî şerefyâfte-i sudûr oldu. (157-b)