Efendi-i mûmâ-ileyh kesret-i îrâd ve dârât ile sâye-i Devlet-i aliyye'de akrânına maksûd ve mağbût ve yâverî-i hazz u baht ile derece-i i'tibârı yevmen fe-yevmen mütezâyid ve gayr-i mahtût olup bu ni'met-i cezîlenin kadrini fehm ile lisânını zabt ve hüsn-i mu'âşeret ve müdârâ ile kulûb-i nâsı cezb ü rabt etmek mümkin iken tarafına teveccüh eden yüsr ü gınâ ve meyl-i dünyâ-yi bî-bakā çeşm-i basîretini nâ-bînâ edüp sinân-ı lisân ile ef'ide-i halkı teklîm ve havass-ı devlet haklarında bilâ-sebeb kadh u ta'nı ta'mîm eylediğinden gayri kapu kethüdâsı olduğu vüzerâya rızâ-yi devlete muhâlif ve kendü hevâsına muvâfık ba'zı husûs ta'lîm ve makbûzu olan cevâiz-i mu'ayyeneyi adem-i teslîm ve bu sebeble nice beliyye ve berzaha düçâr ve halâsiyçün her bâr nakdine nisâr olarak ifnâ-yi emvâl-i bî-şumâr eylediği vâsıl-ı derece-i iştihâr olup bu ukûbât-ı muttasılatü'l-vürûddan (155-b) mütenebbih ve müteyakkız ve sâlik olduğu tarîk-i gayr-i müstakîm erbâbına her devr ü asırda tertîb eden sû-i mükâfâtı te'emmül ile münzecir ve mutta'iz olduğu medâr-ı râhat ve huzûr olan der-i devletden mehcûriyetini subh u mesâ hedm ü binâ ve tarh u inşâsiyle mukayyed olduğu kusûr-ı âliyât ve eb- niye-i râsiyâta dûrdan nigâh-endâz-ı hasret olmasını iktizâ edüp binâen-ala-zâlik işbu Rebîʿülevvelin ikinci hamîs günü mûmâ-ileyh çavuş-başılıkdan maʿzûl ve alâ-tarîki'l-nefy Edirne cânibine eğerçi mersûl olup ancak îrâd ve emvâlinin kesreti ve havâşî ve mensûbâtının vefreti ve taşrada her taraf ile halta ve ülfeti hasebiyle bâ-vezâret icrâ-yi lâzıme-i hizmet kendüden melhûz olduğundan başka hâlâ Belgrad muhâfızı olan Vezîr Râif İsmâʿîl Paşa Belgrad'a kable'd-duhûl refʿ-i vücûdları rütbe-i vücûbe mevsûl olan baʿzı fitne-kârân-ı serhaddi üslûb-i mergûb üzere tahvîf ve terhîb edüp lâkin tarafından emniyyeti meslûb olan mehâzilin rûz be-rûz âsâr-ı fitne ve fesâdları zuhûr ve bürûz ve bir vakt-i tengde rekîz-i zamîrleri olan adâvet ve bağzâyı müşârün-ileyh hakkında iʿlân ve mukābele-i aʿdâda vâkiʿ böyle serhadd-i azîmde defʿi müteʿassir baʿzı hâdise zuhûr eyleyeceği baʿzı karâ'in-i hâliye ile nümâyân olup müşârün-ileyhi vukūʿu mutasevver olan işbu gā'ileden himâye ve serhadd-i hâkānîyi ihtilâlden vikāye umûr-ı müstahsene ve lâzımeden olduğuna binâen müşârün-ileyhin azli ve Silistre veyâhud İsmâʿîl cânibi seraskerliğine nakli vâfir eyyâmdan berü tasmîm olunmuşidi. Efendi-i müşârün-ileyhin bâlâda zikr olunduğu üzere her taraf ile ülfeti olduğundan gayri Belgrad'da mukātaʿatı (156-a) ve serhadlü ile âmîziş ve ihtilâtı olmağla Belgrad muhâfızlığı bâ-rütbe-i celîle-i vezâret tarafına tevcîh ve inâyet buyurulmak müstasveb olup ancak Âsitâne-i saʿâdet'de ihsân-ı vezâret olunsa nâs ile olan muʿâmelâtı mânend-i mû-yi zengî müşevveş ve derhem olmağla tez elden fezleke-i hisâbı bulunmak müteʿassir ve beş-altı mâha dek harekete mecâli olmayacağı dahi zâhir olduğundan Karışdıran menziline vâsıl olduğu günü Belgrad muhâfızlığı ile müşârün-ileyhe ihsân-ı vezâret olunup münhal olan çavuş-başılık hizmeti silâhdâr ağası Şehsuvar-zâde Hamdullah Bey-efendi'ye tevcîh ve silâhdâr ağalığiyle dahi sâbıkā mîrâhor-ı evvel olan Hüseyin Ağa'nın fi'l-cümle hâli terfîh olundu. Muhâfız-ı sâbıkın me'mûriyyet-i cedîdesi şimdiden maʿlûmu olmak lâzım gelse yerine kā'im-makām nasbiyle me'mûr olduğu cânibe hareket edeceği meczûm ve Belgrad'ın muhâfızdan hulüvvü nâ-münâsib olduğu dahi maʿlûm olup binâberîn halefi varıncaya dek müşârün-ileyh kemâ-fi'l-evvel Belgrad'da ârâm ve hizmet-i muhâfazaya kıyâm eylemesi ve sûret-i me'mûriyyetini baʿdehû tarafına ifhâm olunacağı zemîninde tarafına hitâben emr-i ʿâlî ısdâr ve mektûb-ı hazret-i sadâret-penâhî tisyâr olundu.