İki-üç seneden berü Boğdan voyvodası olan Aleksandra baʿzı nâ-cins eşhâsa mukārenet ile Boğdan reʿâyâsını küllî izrâr ve tahammüllerinden hâric tekâlîf-i şakka ile bî-zâr eylediğinden gayrı taraf-ı Devlet-i aliyye'den Boğdan voyvodalarına (154-b) ihâle olunan umûr-ı lâzımenin te'diye ve tekmîlinde kusûr ve tehâvünü âşikâr olup bu gûne hareketden ferâgat ve sû-i karîn makūlelerini defʿ ile fukarâyı sıyânet ve tamâʿ-ı hâm-ı tebaʿiyyetden mücânabet eylemesi birkaç defʿa tarafına tahrîr ve işâret olunmağla mütenebbih ve müteyakkız olmayup kâr-ı nâ-savâbında ısrâr ve reʿâyâ dahi muztarr ve nâçâr kalup kimi celâ-yi vatan ihtiyâr ve kimi tehyie-i esbâb-ı firâr eylediği vâsıl-ı sâmiʿa-i hazret-i şehriyâr-ı adâlet-âsâr olduğuna binâen voyvoda-i mesfûr işbu şehr-i Rebîʿül-evvel gurresinde maʿzûl olup Dîvân-ı hümâyûn tercümânı olan Aleksandra, Boğdan voyvodası nasb u taʿyîn ve Eflâk kapu kethüdâsı olan Sarı Bey-zâde dîvân tercümânlığıyla mesrûr ve kâmbîn kılındı.