Sâbıkā Delvine mutasarrıfı olup mîrimîrândan Selîm Paşa Arnavud tâifesi usâtını başına cemʿ ve mâl-i mîrîyi ahz ü belʿ eylediğinden gayri fukarâ-yi raʿiyyete dest-i taʿaddîyi itâle ve etrâf ve eknâfâ rahm u insâfdan berî olan gâret-gerleri taslît ve havâle edüp ahz-i intikāmdan dest-i mikneti kütâh olan nice bî-günâhın bu mülâbese ile hâli tebâh ve leyl ü nehâr kâr ü girdârları feryâd u âh olduğu vâsıl-ı sımâh-ı pâdişâh-ı adâlet-penâh olduğu anda şakī-i merkūmun hakkında seyf-i siyâset ilmaʿ ve izâle-i vücûd-ı habâset-âlûdiyle sadâ-yi adâlet ve dâd sâir zaleme ismâʿ olunmak irâde buyurulup husûs-ı mezkūrun icrâsiyçün hâlâ Delvine mutasarrıfı olup mîri- mîrân-ı kirâmdan Velî Paşa-zâde Alî Paşa'ya doksansekiz senesi Zilkadesi evâsıtında hükm-i kazâ-mezâ isdâr ve paşa-yı mûmâ-ileyh keyfiyyet-i me'mûriyetinden haberdâr oldukda sâlifü'z-zikr Selîm Paşa'yı ve hevâsına tâbi' olan eşkiyâdan Bekir Kuka-oğulları demekle ma'rûf Hasan ve İbrâhîm nâm şakāvet-pîşeleri bilâ-âmân ahz ü katl ve ru'ûs-ı menhûselerini Der-ʿaliye'ye irsâl edüp mûcib-i ibret olmak içün galtân-ı meydân-ı mezellet kılındı.