Şehr-i mezkûrun ondokuzuncu salı günü galebe dîvânı olup te'yîd-i ahd-i cedîd zımnında bundan akdem İspanyalu cânibinden vürûd eden elçi hâk-i atebe-i ulyâya rû-mâl olup nâmesini teslîm ve hedâyâsı olan bir kıtʿa musanna hayme ve beyaz atlas üzerine işleme bir oda takımı ve bir kıtʿa elmaslı sorguc ve bir mikdâr sîm ü zer evânî ve birkaç top üsküfe ve kadife ve atlas ve birkaç pastav çuka ve kına kına ve enfiyye ve bir mikdâr hubûbat arz ve takdîm edüp huzûr-ı hümâyûnda mesfûra sevb-i aʿlâ semmur ve maʿiyyetinde olan beyzâdegânın baʿzısına kakum ve bazılarına hilʿatler iksâ olundu. Bundan başka Cezayirlü ile vukūʿ bulan muhârebelerde giriftâr-ı eyâdî-i menhûseleri olan üserâ-yi müslimînden Cezayir'de mütemekkin olmayup sâir bilâd-ı pâdişâhîde sâkin kimesnelerden el-yevm mevcûdları olan altmış nefer ehl-i islâmı taraflarından iksâ ve ihdâ sûretinde Bâbıâlî'ye takdîm eyledikleri mübarek rikâb-ı kâm-yâb-ı hüsrevâneye arz u inhâ olundukda kemâl-i şefkat ve merhamet-i mülûkâneden nâşî (V129-b) huzûr-ı mevâhib-mahsûra ihzâr olunmalariyle irâde-i sâmiye taʿalluk edüp derhal zikr olunan üserâ Saray-ı âmire'ye isrâ ve cümlesi manzûr-ı şehriyâr-ı bî- hemtâ olup bin beş yüz guruş ihsâniyle kulûb-ı münkesîreleri mecbûr ve Dârüssaʿâde ağası hazretleri tarafından dahi bin guruş iʿtâsıyla mesrûr kılındıkdan sonra tekrâr Bâbıâlî'ye avdet ve taraf-ı âsafîden dahi bin guruş verilüp tekmîl-i lutf u mürüvvet kılındı.