Sadrıazamlara mahsûs olan saray-ı dilârânın alay-köşkü mukābilinde vâkiʿ olan kapusunun pîşgâhında teng ve saʿbü'l-mürûr ve tarafeyninde olan dekâkînin yek-diğere kurbiyeti takrîbi ile avâmm-ı nâs hâneleri tavrından farkı olmadığı zâhir ve gayr-i mestûr olup infisâh ve ittisâʿı ve mürûr u ubûr hâlinde nâsda ârız olan sıklet ve zahmetin indifâʿı lâzıme-i şân-ı devlet idüğü masârifden ictinâb ile bu âna dek tevsîʿine ikdâm olunmamışidi, ale'l-husûs ağayân-ı enderûn-ı sadâret-penâhîye meydân-ı rekzü'l-hayl-ı azmâyiş olan Kum meydânının dahi kemâ-yaktazî vüsʿati olmayup cirîd-endâzân ve nîze-bâzâna icrâ-yı lâzıme-i kerr ü ferr müşkil-ter olduğuna binâen dâire-i fâhirelerinde enderun ağaları ve sâirleri harb ü darb kavâidini ve gaza vü cihâd etvârını her bâr tahsîl etmek kasdına mebnî kazâ-yı merkūmun tevsîʿine taraf-ı sadr-ı âlî-kadrden meyl ü rağbet nümâyân ve lüzûmu olan mahaller değer-bahâ ashâbı irzâ (V128-b) oluna, iştirâ akabinde ihzâr-ı amele ve bennâyân ve az vakit içinde tevsîʿ-i tarîk ü meydân kılınup mahall-i merkūmda bir sebîlin binâsı dahi gāyet ehemm görülmekle icrâ-yı mâ-i lezîz ile Bâbıâlî köşesinde bir sebîl-i bî-adîl binâ ve leb-teşne-gânı irvâ ile mazhar-ı hayr-duʿâ oldular.