Kalyoncu zümresinin öteden berü mazbût ve muʻayyen kışlakları olmayup Kasım Paşa ve Galata sâhillerinde bekâr odaları taʻbîr olunan buyûtda ikāmet ile ihzâr-ı maʻârif ve kıyân ve tavʻan ve kerhen girîbân-gîr-i nisvân ü gılmân olarak fısk u fücûru iʻlân ve katı çok muhadderât ve ehl-i iffeti delâlet-i pîre-zenân pür-mekr ü hîle ile sayd ve pençe-i mürg-i serâzâdları beste-i kayd eyledikleri ve bu emr-i münkerin menʻinde gürûh-ı zâbitân acz-âver ve ikāʻ-ı tehdîde kudretleri olmadığından adem-i mübâlât ve iğmâz-ı zarûrî ile masdar-ı şerr olmuşlar idi. Salâbet-i dîniyyesi maʻlûm-ı sıgâr u kibâr ve âvâze-i gayret ü hamiyyeti münteşir-i bilâd u emsâr olan (116-b) Kapudan-ı deryâ Cezâyirli Vezîr Gâzî Hasan Paşa hazretleri müddet-i medîdeden berü bu hâlât-ı gayr-i marziyyenin vukūʻundan müşmeʼiz ve müteneffir olup sûret-i hüsn-i müdâfaʻasını her zamân tefekkür ve bir râbıta tahtına idhâllerini ân be-ân teemmül ve tedebbür eyler idi. Defʻ-i münker ü fesâd ve fikr ü salâh u sedâd eden zevâtın kulûbu mevrid-i feyz-i samadânî ve mevkiʻ-i ilhâm-ı Rabbânî olduğuna binâen zikr olunan ve eşhâsa bi'l-ihtisâs mesken ve menâs olmak üzere müceddeden kışlakları ihdâs ve binâ olmak devâʻîsi kalb-i pür-safvetlerinde zuhûr ve zabt u rabtlarına bundan aʻlâ vesîle olmayacağı nezd-i müşîrîlerinde eğerçi gayr-i mestûr olup ancak mâ-sadak-ı في قلوبهم مرض olan baʻzı ehl-i hased ü garaz bu eser-i hayrın taraf-ı müşârün-ileyhden cilve-ger-i mevkiʻ-i husûl olması husûsunu adem-i irâde ile fesh-i azîmet etdirmeğe niyyet ve baʻzı mevâniʻ ve mahzûr îrâd ile bu emr-i mühimmin ilgā ve ibtâline saʻy ü dikkat etmişler iken müşârün-ileyh hazretleri umûr-ı hayriyyede meslek-i kadîmleri olan tesebbüt ve tecellüd vâdilerine sâlik ve bu re'y ü ictihâdlarını kuvvetden fiʻile îsâl içün mütehâlik olduklarına binâen derhâl izn ü ruhsat-ı ulu'l-emri istihsâl ve Tersânede vâkiʻ anbarlar kurbinde yeniçeri odaları misillû ahsen-i eşkâl olan şekl-i murabbaʿda üç tabaka üzerine îcâd ve dâhil-i tabakatda müteʿaddid büyût ve ale'l-husûs taʿallüm-i furkān-ı mübîn ve ikāme-i imâd-ı dîn içün dershâne şeklinde bir mekteb-i lâtîf ve bir câmiʿ-i şerîf (117-a) bünyâd ve baʿîdden icrâ-yı âb-ı nâb ve itāş-ı nâsı reyyân ve sîr-âb edüp uğur-ı dîn ü devletde dâimâ sarf u istihlâk etdiği misillû iktizâ eden masârif-i kesîresini kendü mâlinden sarf u iʿtā ve mîrîden bir akçe istidʿâ etmeyerek baʿde't-tetmîni kalyoncu zümresine tahsîs ve taksîm ve mahall be-mahall zâbitler taʿyîni ile esbâb-ı zabt u rabtı taʿlîm ve tefhîm edüp sâbıklarda vukūʿ bulan hâlât-ı müstenkere bu vesîle ile zâil ve zikr olunan tâife oldukça semt-i fevz ü felâh ve cihet-i zühd ü salâha mâil olduklarından gayri mücâhirûna muhtass olan amel-i nâ-sutûdeleri âtıl ve zimâm-ı zabt u rabtları kabza-i tasarrufa dâhil olup ehl-i ırz makūlelerine medâr-ı emniyyet ve tummânîyet ve hevâperestân-ı rûzgâra bâis-i nedâmet ve inâbet olduğu ve hak budur ki bu madde-i nâdiretü'l-vukūʿ müşârün-ileyh hazretlerine ser-satr-ı sahîfe-i hasenât ve dîbâce-i cerîde-i hayrât u meberrât olmağa şâyân ve ila-intihâi'd-deverân hulûd-i zikr-i cemîl ve bekā-yi nâm-ı nebîlerine vesîle olacağı vâreste-i kayd-ı beyândır. (118-a).