Roma imparatoru ve Nemçe memâlikinin kralı cenâblarının zîrde mumzî murahhas orta elçisi dâîleri işbu sene-i mübâreke Rebîʿülâhirinin ikinci günü târîhiyle müverrah bi'l-cümle memâlik-i Osmâniyyede Nemçe tüccâr ve reʿâyâsı hakkında icrâsı lâzım muʿâmeleye dâir taraf-ı Devlet-i aliyye'den verilen senedi bilâ-avk u tehîr devleti cânibine îsâle müsâraʿat etmişdir. Bu def'a irsâl olunan ulağımızın avdetinde devlet-i imparatoriyyenin kabûliyyetine müşʻir der-i Devlet-i aliyye'ye arz u takdîm edeceğim takrîrde sened-i mezkûrun dîbâcesinde münderic olup Devlet-i aliyye'nin tüccâr ve reʿâyâsı ve sefâini bi'l-cümle memâlik-i imparatoriyyede mütemettiʿ olacakları müsâlemât ve münâfaʿâta dâir olan hususların bi'l-cümlesi tasdîk ve te'yîd olunacağını bu dâîleri resmen tahkîk eder ve bu vechile bi'l-cümle memâlik-i imparatoriyyede en müsâʿade olunan milletin hakkında câri olan mu'âmele bi'l-mücâmele ve dahi ziyâde devlet-i saniyye tüccârı (107-b) ve reʿâyâsı ve tüccâr sefâini haklarında dahi câri olacağı bî-iştibâhdır ve bu vechile hem-cıvâr olan işbu iki devlet-i fahîmenin beynlerinde adîmü'l-misâl olan kırk beş seneden beru bilâ-infisâm ve'l-inkıtāʿ cârî ve pâydâr olan musâlâha-i mübarekenin esnâsında vâkiʿ olup tarafeynden râbıta-bend-i nizâm olan bi'l-cümle umûr ve musâlih devleteyn miyânelerinde olan tehâbb-ı sâdıka ve tevâdd-ı hâlısa-i lâ-yetegayyerenin takviye ve istihkâmına vesîle-i sâbite olmuşlardır. Ve zîrde mumzî dâʿileri işbu iki devlet-i fahîmenin zamâir-i safvet-semîrlerinin birinin mü'evvil ve müfessiri ve birinin dahi re'ye'l-ayn ile şâhidi bulunmak hasebiyle kendüsünü saʿîd ve müteyemmin add birle hulûs ve hayır-hâhlık ekmelinin tasdîk ve tahkīk-ı hâlisânesi taraf-ı Devlet-i aliyye'den karîn-i kabûl buyurulmasını hasseten ricâ ve niyâz eder.