Kassab başılar tarafından ber-vech-i muʿtâd tedârük ve celb olunacak ağnâmdan mâ-ʿadâ memleket-i Eflâk'dan yüzaltmış bin re's ganem, voyvodası maʿrifetiyle tedârük ve tehyi'e ve yetmiş bin re'si rûz-ı Kasımdan on gün mukaddem ve ellibin re'si dahi Kânûn-ı evvelin yirmisinde ve kırkbin re'si Kânûn-ı sânînin onuncu gününde Âsitâne-i saʿâdet'e vâsıl olmak ve her defʿada gelecek ağnâmın mikdâr ve ecnâsı taʿyîn olunarak voyvoda tarafından celebler yedlerine maʿmûlün-bih memhûr tezkereler iʿtâ ve evkāt-ı selâse-i muʿayyenede tamâmen Âsitâne-i saʿâdet'e vürûd ve kasabalara tevzîʿ olunmak ve kezâlik memleket-i Boğdan'dan yüzyirmibeş bin re's ganem tedârük ve ellibeş bin re'si Kāsımdan on gün mukaddem ve kırk bin re'si Kânûn-ı evvelin yirmisinde ve otuz bin re'si Kânûn-ı sânînin onuncu gününde Âsitâne'ye vâsıl olmak üzere mukaddemâ nizâm verilüp beher sene kıllet-i lahmdan ibâdu'llâha ârız olan ıztırâbın indifâʿıyla husûl-i refâğ-ı ʿayş-i enâm iğtinâm olunmuşidi. "Ervau min teale" meseline sezâ kasab (60-a) başı olan Mehmed Ağa hâssa-i lâzıme-i lakabı olan desâis ve hiyele ke-mâ sebak mübâşeret ve tamaʿ-ı hâma tebaʿiyyet ve celeblerin mugāyir-i nizâm birbirine müsâbakatle hulûl-i evkāt-ı muʿayyeneden evvel vürûdlarına izn ü ruhsat verüp bu esnâda kabl-i meciü'l-vakt celeblerin baʿzısı minvâl-i muharrer üzere tahsîl-i ruhsat akabinde katı çok ağnâm getirüp kasablara tevzîʿ murâd eyledikde emr-i tertîb ve nizâma riʿâyeten kasablar kabûlünden iʿrâz ve Âsitâne-i saʿâdet'in etrâfı merʿa ve zerîbeden hâlî olduğuna binâen ber-vech-i tahmîn seksen bin mikdârı ağnâm resîde-i mıʿraz-ı telef ü inʿidâm olup verilen nizâm-ı cedîdin berhemzede-i ihtilâl olmasına ve hutâm-ı dünyâya hırs u tehâlük sebebiyle bu kadar ağnâmın bilâ-mûcib itlâfıyla celeblerin küllî hasâretlerine illet olmağla zuhûr eden sû-i sanʿına pâdâş ve cezâ muhâfaza-i esbâb-ı nizâma iʿtinâ kabîlinden olduğuna binâen der-akab mûmâ-ileyh azl ü tenkîl ve zikr olunan kasabbaşılık hâlâ cebecibaşı olup me'mûr olduğu hidemâtda istikāmeti mücerreb olan İsmâʿîl Ağa'ya ber-vech-i ilhâk tevcîh ile tebcîl olundu. Mûmâ-ileyh Mehmed Ağa bundan akdem kasabbaşı iken yine bu misillü nâ-bercâ harekete tasaddî ve ridâ-i hırs u tamaʿla tereddî eylediğinden bi'l-iktizâ tîr-i azle âmâc ve hisâbı rü'yetinde zimmetinde katı çok mîrî akçesi çıkup hengâm-ı tahsîlde bi-hasebi'z-zâhir füls-i ahmere muhtâc (60-b) olup bu sergüzeşt ile pend-pezîr ve Eşʿab-pesend olan tamaʿ u âzı fî-mâ-baʿd dârûy-i istikāmetle kābil-i tedbîr olur mülâhazasıyla rîş-i sefîdine merhameten bir müddetden sonra yine mansıb-ı evveline iʿâde ve her husûsda kendüye müsâʿade olunmuşiken adem-i tenassuh ile tarîk-i müstakîm-i sadâkatden udûl ve az vakitde başına gelen ukūbetden gaflet ve zuhûl etmesi mahall-i taʿaccüb-i ehl-i ukūldür.