Mîr-i mûmâ-ileyh illet-i herem ü pîrîden nâşî işbu Muharremü'l-harâmın yedinci günü sahn-ı âlem-i fânîden alem-efrâz-ı rıhlet ve ihtiyâr-ı sefer-i âhiret edüp münhal olan mîr-i alemlik kapucu-başıların akdemi Bekir Paşa-zâde Mehmed Bey-efendiye tevcîh ve inâyet ve Arz odası'nda dûş-i sadâkat-pûşine ilbâs-ı hilʿat olundu. Tercüme: Müteveffâ-yı mûmâ-ileyh bin yüz yirmibir târîhinde Bağdâd vâlisi Eyyüblü Vezîr Hasan Paşa merhûmun kethüdâlığından neş'et ve yirmisekiz târîhinde Körfez seraskerliği ile kesb-i şöhret eden Vezîr Kara Mustafa Paşa'nın ferzend-i dilbendi olup bir zamân pederine kethüdâ ve yüz kırkiki târîhinde kapucu-başılık ile kâm-revâ ve yetmişdört senesinde bi-hasebi't- tarîk mîr-i alem ve işbu mâh-ı Muharremin yedinci günü ber minvâl-i muharrer râyet-keş-i vâdi-i adem olup sinni ber-vech-i tahmîn ömr-i tabiʿîye karîb ve muʿammerînden bir pîr-i necîb idi.