Sulb-i Mustafa Hânî'den bin yüz on târîhinde mahmiye-i Edirne'de vücûd-yâfte olan Safiye Sultan Hazretleri seksenbeş sene safâ-yı hâtır ile mu'ammer ve mâh-ı mezkûrda vücûd-ı nâzenînleri şiken-i insıbâb ile mükedder olup birkaç gün müdâvât ile iştigāl olundiyse dahi fâ'ide-mend olmayup dâr-ı âhirete intikāl ve istîfâ-yı ömr-i serîʿü'z-zevâl eyledi. Kānûn üzere techîz (95b) ve tekfîn ve Sultan Süleyman Câmiʿi hazîresinde ihzâr olunan lahde temkîn olundu. Tertîb eyledikleri vakfın nemâsından idâre olunmak üzere Ayasofya ve Sultan Mehmed ve Sultan Bayezid ve Vâlide câmiʿlerinde dersiye ve vaʿziye ve duʿâ-gûy vazîfeleri taʿyîn ve fazla-i vakfdan ahâlî-i Haremeynü'ş-şerîfeyn'e her sene surre göndermek hayrâtiyle celb-i rızâ-yı Rabbü'l-âlemîn eylediğinden gayri Lutfi Paşa Mahallesi etrâfında müceddeden çeşme binâ ve li-vechi'l-lâh mâ-ı lezîz icrâ ve nice eytâm ve erâmilin müşkilât-ı umûr-ı zarûriyelerini vâsıta-ı cûd u inâyeti ile sehl ü âsân ve katı çok âciz ve bînevâyı hafr-ı âbâr ile sîr-âb-ı lutf u ihsân eylediği müstağnî ani'l-beyândır.