Tevkīʿî paşa (94b) Şevval'in beşinci günü tevcîhât vâkiʿ olup Çavuşbaşı Ahmed Nazîf Efendi Darbhâne'ye nakl ve Rûhî Süleyman Ağa hıdmet-i mezkûreye vasl olunup sâir menâsıbın baʿzısı ibkā niʿmetine inâle ve baʿzısı tevcîh-i cedîd ile erbâbına ihâle olunup mansıbdan ye'is ü nevmîd olanlar dahi atâyâ-yı ber-mezîd-i şâhâne ile iktisâb-ı îş ü ragîd eylediler. Şah Sultan hazretlerinin tevkīʿî paşaya inʿikādı bâlâda ketb ü ifâde olunmuşidi. Otuzbir gün sonra zifâf maslahatına mübâşeret ve Şevval'in onbeşinci günü sadrıazam ve şeyhülislâm efendi ve kapudan paşa ve sadreyn ve eshâb-ı menâsıb bi-ecmaʿihim Saray-ı hümâyûna daʿvet olunup dârüssaʿâde ağası odası etrâfında intizâr ve müşârünileyhâ Harem-serây-ı hümâyûndan gerdûne süvâr izz ü iʿtibâr olunduğu hîn-i âlây-i dil-firîb tertîb olunup herkes alâ-merâtibihim pîş-rev-i cenâb-ı sultânî ve o dürr-i akīleyi saray-i âlîlerine îsâl ile itmâm-ı hidmet-i nigeh-bânî edüp baʿde'l-işâ o neyyireyn-i semâ iʿtilâ yek-diğer ile iltikā ve ferdâsı şehriyâr-ı gîtî-ziyâ resmen Sarây-ı Sultânî'ye şeref-bahş-i vusûl ve birkaç saat ikāmetten sonra sarây-ı behişt-âsâlarına avd ü kufûl buyurdular.