Şehr-i Cumâdelûlâ'nın dördüncü Salı günü tavâ'if-i askerînin bir kıst mevâcibleri tertîb olunan dîvân-ı âlîde eyâdî-i emânet-kârâne teslîm ve bu ârîfe-i cihân-sûd-ı pâdişâhî bây ü gedâ hakkında taʿmîm olundu. Mâh-ı mezbûrun onüçüncü günü İbrâil muhâfazası şartiyle Eyâlet-i Anadolu Aydoslu Vezîr Mehmed Paşa'ya ve Vidin muhâfızlığı sadr-ı esbak Silâhdâr Mehmed Paşa'ya ve Selânik Sancağı Vezîr Silâhdâr İbrâhim Paşa'ya ve Hanya muhâfızlığı Mîriâhur Mustafa Paşa'ya tevcîh olunup, Bender muhâfazasına me'mûr Rumeli Vâlîsi Vezîr Abdullah Paşa'nın vusûlü vakte muhtâc olduğuna binâen Deliorman nizâmına taʿyîn olunan Vezîr Mehmed Paşa müşârünileyhin vusûlüne dek Bender muhâfazasında kıyâm etmek bâbında tarafına hitâben misâl-i lâzımü'l-imtisâl irsâl olundu.