Müşârünileyh yâveri baht-ı sâz-kâr ile sâye-i devlette kesb-i debdebe ve iştihâr ve alelhusûs müddet-i medîdeden berü maʿdenler emânetinde emvâl-ı vâfire iddihâr edüp (54b) sefer hitâmına karîb Ordu-yı hümâyûn'a me'mûr ve beri yakadan Beşiktaş tarafına mürûr ve âheste-reftâr ile Edirne Sahrâsı'na darb-ı hıyâm ve at çayırtlamak sûretinde ferş-i kilim-i ârâm etmişidi. Ordu-yi hümâyûn Şumnu'da mahsûr olduğuna binâen rikâb ve ordu taraflarından bir an akdem imdâda müsâraʿat eylemesi evâmir ü mekâtîb ile tarafına inhâ ve vaʿd ü vaʿîd ile teşvîk ve iğrâ olunmuşiken mühr-i hümâyûn me'mûliyle izhâr-ı betâet ve şiddet-i muhâsaraya illet olup ne hâl ise Edirne'den tahrîk-i pâ ve birkaç günde ancak Yanbolu semtlerine resâ ve o esnâda sulh münʿakid ve müşârünileyh Anadolu tarafına geçüp tahallüf-i matlabdan dilgîr ve münharid olmuş idi. Hakkında tertîb-i cezâ muzmerr iken dâiresi mükemmel ve şöhreti âlemgîr bir vezîrdir. Şumnu'ya varmadığından "belki maʿkūl sözü vardır” deyü etrâf taʿmîr kaydına düşüp sulh sürûru dahi teʿâkub ettiğinden sû-i fiʿline adem-i mukābele ve afv ile muʿâmele olunmuşidi. Bâlâda beyân olunduğu vech üzere Bağdad'a varup Vezîr Ömer Paşa'yı hilâf-ı emr-i ʿâlî iʿdâm ve hazâ'in-i mülûkda vücûdu nâ-yâb, emvâl ve tefârıkını iğtinâm edüp lâbe-i Acemâneye firîfte olarak Basra'nın gāretine illet ve intifâ-yı nüfûz ile fî-mâ-baʿd yedinden bir maslahat gelmeyeceği maʿlûm-ı erkân-ı saltanat olmağla azl ve Diyârbekir'de kalʿa-bend ve haseki mübâşiriyeti ile katîl-i mâr-kemend oldu. Müşârünileyh beyne'l-ʿavâm Ispanakçı Mustafa Paşa ismiyle meşhûr olup sekîne ve vakār sıfatıyla muttasıf ve nahvet ü unfe ile (55a) mü'telif, cûd u sehâsı müsellem ve dâiresine müntemî olanların ekserisi sâhib-i tuğ ve alem olup hakkında bu sûretin vukūʿu bâʿis-i hüzn ü teessüf ve sebeb-i endûh ve telehhüf olup Ömer Paşa'ya ettiği gadr-i sarîh âkıbet-i vücûdunu ifnâ ve dest-i cezâ hakkında مَنْ قَتَلَ قُتِلَ hükmünü icrâ eyledi. Müşârünileyh ricâl-i devlet menâsıbında dahi devrân ve çavuşbaşılığı hengâmında fasl-ı daʿvâ ve irzâ-yı husemâda sebk-i akrân edüp, maʿden emîni iken mîrimîrân ve sefer vukūʿunda kā'immakāmlığa celb olunmuş iken nısf-ı tarîkden iʿâde ve vezâret ile mazhar-ı lutf u ihsân olmuşidi.