Sadrıazam cenâbları şehriyâr-ı menâyih-âsâr hazretlerini saray-i âsafânelerine daʿvet içün ferş ve cennât-ı zarâʿet ve padişah-ı gerdûn-bastat sadr-ı müşârünileyhi mücerred tevkīr içün ziyâfetine icâbet edüp Şevval'in yedinci günü kemâl-i debdebe ve dârât ile Paşa-kapusu'na şeref-res-i vürûd ve Sadrıazam, Paşa-kapusu mukābilinde vâkiʿ mektebden istikbâl ile pîşrev-i mevkib-i saʿâdet-endûdları olup seng-i rikâba vazʿ-ı kadem-i meymenet ve hidmet-i bagal-gîrî ile sadr-ı müşârünileyh nâil-i mefharet olup müftilenâm cenâbları dahi misafir odası pîş-gâhında istâde-i rasad-gâh-ı selâm ve hîn-i mukārenette kadd-i hamîde-i taʿzîm ve ihtirâm ve bu fürûşân ile Arz odası'na sâye-endâz ve müşârünileyhimâyı celse-i hafîfe ile manzûr-ı lihâza-i imtiyâz buyurdukları akabinde sâzende-gân ruhsat-yâb ve murâfakat-i hânende-gân ile tanîn-endâz-ı çarh-ı nüh kıbab oldular. Bundan sonra sâir bâzende-gân münâsebet-i îkāʿiye ile lerziş-nümâ-yi taht u fevk ve muharrik-i sâkin hâhiş ü şevk olup gürûh-ı canbâzân dahi sanʿatlarını icrâ ve bâzîçe-i gûnâ-gûn ile gürûh temâşâ beyâna hayret-efzâ oldukları hâlde hengâm-ı şâm mütekārib olup şehriyâr-ı vâlâ-makām (33b) tenâvül-i taʿâm akabinde sadrıazamını bir kabza-i mücevher hançer ile dest-nevâzende-i ihtirâm buyurduklarından fazla bir sevb-i semmûr ile menkib-i ikbâllerini zînet-yâb ve imâd-ı dîn olan şeyhülislâm efendi cenâblarını dahi beyâzâ kaplı semmûr ile kâm-yâb buyurup seng-i rikâbda sadrıazam tarafından ihzâr olunan esb-i sabâ-reftâra süvâr ve saray-ı âmirelerini kudûm-i meyâmin-lüzûm-ı dâverâneleriyle muttaliʿ-i hurşîd-i tâb-dâr buyurdular.