Kibâr-ı hâcegân ve meşâhîr-ı ricâl-i Devlet-i ebed-bünyândan binâ emîni denmekle maʿrûf Yûsuf Efendi üç seneden berü mübtelâ-yı elem-i renc ve mâh-ı mezbûrun onsekizinci günü terk-i sarây-ı sipenc edüp Cağalazâde Sarayı kurbünde binâ eylediği mekteb kurbünde o sâhib-i akl ü idrâk, defîn-i hâk-ı ıtr-nâk oldu. Tercüme: Müteveffâ-yı mûmâileyh Âsitâne-i saʿâdet'de Zâim Abdullah Ağa'nın sulbünden yüz on tarihinde meşîme-çâk-ı tevellüd olup istikmâl-ı derece-i akl-ı heyûlânî akībinde devr-i Ahmed Hânîde meşhûr-ı âfâk olan Sadrıazam İbrahim Paşa'ya intisâb ve giderek iç çukadarlığı hizmetiyle kâmyâb olmuşidi. Devr-i Mahmud Hânîde şems-i ikbâli işrâk ve hâcegân zümresine (19a) ilhâk ve menâsıb-ı rüteb-i âliyeden başmuhâsebe ve rûznâmçe-i evvel ve şehir ve tersâne emânetlerini ihrâz ve kerre-i baʿde uhrâ sadâret-i uzmâ kethüdâlığı zât-ı vâlâsını merciʿ-i erbâb-ı niyâz edüp zâtında merkûz-i mahâil-i sadâkat ve cibilletinde mermûz-i âsâr-ı istikāmet hasebiyle mülûk-i sütûde-sülük ve vüzerâ-yı ʿizâm, mûmâileyh maʿrifetiyle nice kasr u kâşâne ve katı çok saray ve hâne binâ ve bâ-husûs Laleli'de vâkiʿ câmiʿ-i dilârâ-yı dest-yârı tabîʿat-ı miʿmârisiyle tekmîl edüp hüdâvendigâr-ı esbak Sultan Mustafa Hân-ı merhûm misillü bir padişah-ı hakāyık-ı beyyin ve bir şehriyâr-ı kadr-i temkîne hizmet beğendirüp bu sebeble emîn-i binâ ünvâniyle şöhret-nümâ olmuşidi. Hidmetinde bulunanlar havsala-i istiʿdâdları derecesinde kesb-i merâtib ve irtifâʿ-ı şan ve iddihâr-ı emvâl-i firâvân eyledikleri mütevâtir ve dâiresinde olan yümn ü bereket misl-i sâir gibi elsine-i nâsda dâir idi. Zâtına mensûb sebil ve mekteb hakkında istidʿâ-yı rahmet duʿâya sebeb olup hâsılı me'mûr olduğu hidemâtın cümlesinde hilye-i sadâkati nümâyân ve hafî ve celî bir töhmet ile telvîs-i dâmân etmediği hâline vâkıf olanlardan resîde-i gûş-i izʿân olmuştur.