Silahdârlık hidmet-i celîlesiyle ser-efrâz olan Mehmed Emîn Ağa'da olan kābiliyet ve istiʿdâd maʿlûm-ı pâdişâh-ı vâlâ-nijâd olup Muharremülharâm'ın üçüncü günü müntehâ-yı rüteb-i beşeriyye olan vezâret ile behrever ve an-asıl ocak yazıcılığından tarîk-i hâcegâna duhûl ve bir müddet tezkirecilik ve çavuşbaşılık hidemâtı ile meşgûl olan Abdüsselâm Efendi'nin tavr-ı melûfundan sadr-ı vâlâ-kadr hazretleri muğberr olmakla hizmet-i mezkûrede tefennün ve mahâreti mücerreb olan Mehmed Saîd Efendi çavuşbaşılık ile mesrûr ve selefi hânesinde ikāmet ve ârâm ile me'mûr oldu.