Yazıcı Ahmed Efendi'nin taraf-ı hümâyûna hafî ve celî hıdmeti sebkat ve bu mukābelede mazhar-ı nevâziş ü rağbet olup az vakit içinde îrâd-ı kesîr ve nakd-i vefîr tedârik ve katı çok mücevherât ve nefâis âverde-i dest-i temellük edüp bu mikdâr ile iktifâ ve kanâʿat ve elsine-i nâsdan medâr-ı istihlâs olan hırs u tamaʿdan mücânebet lâzım iken celb-i mâla müstedʿî olacak efâʿil ve tasannuʿât-ı acîbe peydâ ve ez-cümle ordu-yi hümâyûn Şumnu'da iken mütemevvilân-ı ehl-i seferden baʿzılarına birer vâhî töhmet isnâdiyle haklarında hatt-ı hümâyûn ısdâr ve o makūlelere te'dîbât ve takrîʿât icrâ olunmasını hayr-hâhâne sevk u ihtâr etmişidi. Nazm: وإذا المحسة بين خيل قرقعت ثبت الصحيح وعنفص المعقود (13b) mefhûmu üzere kendü hâlleriyle mukayyed olanlar bu satvet-i nâgeh-zuhûrdan sâlim ve hevâ-perestân-ı rûzgâr-ı havf-ı muʿâheze ile müteellim oldukları hâlde reisülküttâb bulunan Abdürrezzak Efendi'ye bir mektûbu zuhûr edüp mazmûnunda “siz hânedân-ı devletten bulunduğunuz hasebiyle vâlideniz size vâfir tefârik ü tuhaf terk edüp siz dahi emedd-i ba'îdden berü merâtib-i saltanat ve menâfi'i devlette kâm-rân olduğunuz takrîbiyle vâfîr mâl istihsâl ettiğiniz zâhir olmakla kadîm ve hadîs müddehir-i dârü'l-hizâne-i temellükünüz olan eşyânın defterini tarafımıza irsâl etmeniz hakkınızda mûcib-i hayr ve bâʿis-i indifâʿ-ı gezend ü zayrdır" deyü ifade ve iş'âr ve Sırrı Selim Efendi'ye ve defterdar-ı vakt bulunan Derviş Mehmed Efendi'ye ve sâir mazanne-i menâfi' olan mahallere bu siyakta kāime ve ahbâr tahrîr ve tisyâr eyledi. Âsitâne-i saʿâdet'de o zaman mukīm olan Tâhir Ağa reis efendi'ye "bu âteş-i cevvâlenin intifâsı âb-yârî-i bezl ü iʿtâ ile mündefi' olup imsâk-i mûcib-i emr-i hatar-nâkdir” deyü tahvîf ve sâirlerinin dahi birer mahalden inzâr olunarak vehm ü haşyetleri taz'îf olunmuşidi. Abdürrezzak Efendi muztarr olup "pederim Reisülhâc Mustafa Efendi'den sûret-i teberrükde dürr-i şehvâr ile müzeyyen bir zümrüd tesbîhden gayri mücevher nâmında bir şeyim olmayup taraf-ı saʿâdetlerine takdîm için gönderilmiştir" deyü Tâhir Ağa'ya irsâl-i peyâm ve ol dahi hediyeyi istisgar ile on bin guruş fuzûli zamm ve itmâm ve mûmâileyhin güyâ zararını defʿ ile icrâ-yi şime-i hukūk eylediğini ifhâm ve sâirlerinden dahi katı çok mebâliğ ve eşyâ intizâʿ velhâsıl (14a) dokuz mâh zarfında bin kîseden mütecâviz rüşvet ve ubûdiyet nâmiyle tav'an ve rav'an ahz eylediği dâhil-i dehlîz-i semâʿ olup mukarrebân-ı dâire-i hümâyûndan baʿzıları mûmâileyhin servet ü yesâr ve kesb ü iddihârına hased edüp refte refte mesâvî ve kabâyihini ta'dâd ve akıbet-i mûmâileyhi çâr-tâk-i izz ü rif'atten hazîz-i mezellete ilkā ile şeref-i kurbetten ibʿâd eylediler. Binâen-alâ-zâlik Bağçevanzâde Mustafa Efendi leyyinü'l-cânib ve bu makūle umûra tasaddîden hâif ü hâib olduğunda Şevval'in onuncu günü yazıcılık hidmetine takrîb olunup sâbıkının sukūt-ı i'tibârına sadrıazam i'timâd edemeyüp haftâna bedel ferve-i semmûr ile melhûz-ı nazar-ı ikbâl ve mansıb-ı mevkūfât ile zümre-i hâcegâna idhâl olundu. Teznîb: Efendi-i mûmâileyhin sadme-i musâderesine giriftâr olanlar tenezzül ve idbârına vâkıf oldukları hîn-i istirdâd-ı medfûʿâtlarına iştigāl ve bu keyfiyetin şuyû'undan havf ile o gürûhu irzâ ve defʿ-i ihtimâl eyledi. Abdürrezzak Efendi "verdiğim meblağın reddi bâ'is-i ayb u şenâr olup ancak tesbîh-i pederim bergüzârı olmak hasebiyle reddi matlûbumdur, tereddüt olundukta âlem-i bâlâya istikā ile tevlîd-i belvâ edeceğim mukarrerdir" dedikte filhâl icâbet ve reddiyle izhâr-ı teessüf ve nedâmet eyledi.