Sâbıkā Hanya Muhâfızı Eğribozlu Zaʿîm-zâde Hasan Paşa baʿzı taʿahhüdât ile Vezâret'e tâlib ve câyiz görmeyenlere görenler gâlib gelüp, bi't-tedrîc matlabı tervîc ve zilkaʿdenin on yedinci günü Köstendil [M2 283] Sancağı ve Rumeli Sürücülüğü ile rütbe-i vâlây-ı Vezâret tarafına tevcîh olunup, bu mülâbese ile câme-i rez-i-târ-ı ikbâli tırâz-ı ‘izz ü rifʿatle tezyîn ü tebrîc olundu. Kul Kethudâsı Mehmed Ağa ‘azl-i nâgeh-zûhûra mübtelâ ve Silistire cânibinde olan Ser-zağarî Mustafa Ağa mansıb-ı mezkûr ile kâm-revâ oldu. Cülûs-i hümâyûn ahbârını mutazammın dost olan devletlere ber-vech-i sefâret birer âdem taʿyîni de'b-i kadîm-i devlet olduğuna binâ'en, Anadolu Muhâsebecisi Kabakulak yeğeni Süleyman Bey Nemçe'ye taʿyîn ve Ordu-yi hümâyûn'da kâffe-i levâzımı rü'yet olunup, bir sâʿat mukaddem ‘azîmet eylemesi tarafına ifâde vü tebyîn olundu. Şehriyâr-ı sütûde-âsâr cülûs-i hümâyûnlarının altıncı günü hıyre-sâz-ı çeşm-i eʿâdî ve bâʿis-i hayret-i hâzır ve bâdî olan alay-ı müzeyyen ile hazret-i Hâlid'i ziyâret ve tekallüd-i seyf ile kānûn-i âbâ-i kirâmlarını icrâ ve bu haber-i meserret-eseri şâmil hatt-ı hümâyûn ve teşrîfât-ı seniyye ile çerâğ-ı efrûhteleri olan Kapucular Kethudâları el-Hâc Mustafa Ağa'yı isrâ ve Sadrıaʿzamların nâyil-i sürûr-i evfâ buyurdular. Şeyhulislâm olan Şerîf-zâde Mehmed Monla Efendi ‘azl ü izʿâc ve Dürrî-zâde Mustafa Efendi o câh-ı refîʿ ile hâyiz-i rehîne-i ibtihâc oldu. Zilhicce evâsıtında Kāyim-makām-ı Rikâb Melek Mehmed Paşa ‘azl ve Deryâ Kapudanlığı ile kâm-yâb olup, Vezîr Kapucu Süleymân Paşa, Kāyim-makāmlık ile ‘izz ü şeref iktisâb ve el-yevm Rikâb Çavuş-başısı olan ‘Abdulkerîm Bey dahi maʿzûl ve yerine Lâleli Mustafa Efendi birâderi Mehmed Efendi bağteten menkūl ve çok geçmeden Rikâb Kethudâlığı makāmına mevsûl oldu. Seksen sekiz senesi muharreminden iʻtibâr ile Mekke-i mükerreme Kazâsı, Şâm'dan munfasıl ʻArab-zâde Ahmed ʻAtâʼullah Efendi'ye ve seksen yedi recebi gurresinden Medîne-i münevvere Kazâsı, Edirne'den münʻazil es-Seyyid Mehmed Nâfiʻ Efendi'ye ve seksen yedi recebinden Mısr-ı Kāhire Hükûmeti, sâbıkā Haleb Kadısı Paşmakcı-zâde es-Seyyid Nuʻmân Efendi'ye ve rebîʻulâhir gurresinden Havâss-ı Refîʻa Kazâsı, Şâmî-zâde Mustafa Efendi'ye ve Sadâret-i Anadolu, müddet-i ʻörfiyyesin tekmîl eden es-Seyyid İbrâhîm Efendi ʻazlinden sâbıkā İslâmbol Kadısı Dürrî-zâde Mehmed Nurullah Efendi'ye tevcîh ü ʻinâyet ile mazhar-ı birr ü mekremet kılındı. İstanbul Kadısı [M2 284] Bâbî-zâde bir sene kadar icrây-ı ahkâm ve Mekke'den maʻzûl Kethudâ-zâde Mehmed Sa'îd Efendi, şehr-i rebîʻulâhirin ikinci günü Kazâ-i İstanbul ile kesb-i ecell-i münye vü merâm edüp, Üsküdar Kazâsı dahi, Hıfzı-zâde Mustafa Efendi'ye ihsân ve 'unvân-ı Mevleviyyet ile gonçe-i iʻtibârı küşâde vü handân kılındı.