Şehriyâr-ı gerdûn-bestat ve Tâcdâr-ı İskender-himmet hazretlerinin bâʿis-i âsâyiş kâffe-i ʿibâd ve sebeb-i emniyyet-i sâkinân-ı bilâd olan vücûd-i ʿâlem-sûd-i şâhânelerine birkaç mâh mukaddem taʿtîl-i cevârih edecek derecelerde insıbâb ʿârız olup, der-ʿakab etıbbâ vü hükemâ fasd u tedbîr ile o ʿillet-i ʿasîru'd-devâyı pezîrefte-i hayyiz-i şifâ edüp, şükran li-hâzihi'n-niʿam zebh-i karâbîn ve tevzîʿ-i nüzûr u sadakāt ile itʿâm ve ignây-ı fukārâ vü mesâkîn kılındığından başka, vech-i zemâna beşûş u mübtehic ve şevk u sürûr-i ʿâlem müteheyyic olmuşidi. Nezle-i hâddenin ʿan-asl insıbâbı, galebe-i hücûm ile vücûd bulduğuna binâ'en, Ordu-yi hümâyûn tarafından müteʿakibu'l-vürûd olan mükeddirât-ı ahbâr o Şehinşâh-ı dindârı ʿillet-i mezkûre ile bî-mâr edüp, zilkaʿdenin sekizinci cuma günü nazm: Erâ'l-mevte yahtâru'l-kirâme ke-'ennehü Li-ehli'l-meʿâlî ve'l-mekârimi ʿâşıkun mefhûmunca o şemʿ-i bezm-efrûz-i dîn ve râz-ı âşinâ-yı ʿilme'l-yakîn hurşîd-i felek ʿizz u temkîn bârân-ı rahmet-zemîn hakān-ı cihân ve İsfendiyâr-ı tüvân hazretlerinin nefs-i mutma'innesi, “İrciʿî ilâ Rabbiki” emr-i Şerîfi'ne imtisâl ve ʿâlem-i vahdete tahrîk-i ecniha-i bâl eyledi. Nazm: Dâru's-selâm cilve-gehin ihtiyâr edüp, Peyvendi kesdi rişte-i kayd-ı zemâneden Meyl-i fezây-ı ravza-i mülk-i bekā edüp, Şeh-bâz rûhu uçdu bu teng-i âşiyâneden. Yarlıg-i belîg, “Tü'ti'l-mülke men teşâ'ü” iktızâsı üzere nevbet-i hilâfet zât-ı hümâyûnlarına muhasses olan ah-i vâlâ güherleri Şehzâde-i civân-baht lâyık-ı serîr u taht gül-i nevreste-i hadîka-i kâm-kârî ve dürr-i şehdâne-i sadef-i bahtiyârî es-Sultân ʿAbdulhamîd Hân bin es-Sultân Ahmed Hân hazretleri etbâk-ı ümmet ve icmâʿ-ı erkân-ı saltanat ile câlis-i evreng-i [M2 279] ʿOsmânî ve zîb-ârây-ı mesned-i Cihânbânî olup, bi'lcümle vüzerâ vü ʿulemâ vü erkân-ı saltanat icrây-ı şart-ı beyʿat ve îfây-ı lâzime-i tehniyyet eyleyüp, [mısrâ] ʿAynün tesürru ve ʿaynün minke tebkînî mâ-sadakı üzere tabl u sûrnâ vü top ve sâyir esbâb-ı şâdümânî ile iʿlân-ı cülûs-i Hâkānî'ye mübâşeret eylediler. Nesîb Efendi bir taʿmiyye ile, “Halîfetullah” (خليفة الله) terkîbini cülûs-i hümâyûn târîhi olarak inşâd ve câyize-i vefîre ahzıyla harâbe-zâr hâtırını âbâd eyledi. Dürrâc-ı rahmet-i Rabb-i gafûr olan Hudâvendigâr-ı sâbık hazretlerinin emr-i techîz ü tekfîni mülûk-i sütûde-sülük âyîni üzere tetmîm ü ikmâl ve müretteb alay ile bundan akdem binâ vü ihyâ buyurdukları Lâleli Câmiʿ-i şerîfinde iʿdâd etdikleri mezâr-ı pür-envârlarına taʿzîm ü ibcâl ile idhâl olundu. Sekene-i İstanbul bu Padişâh-ı mağfûrun gözden nihân ve ʿâlem-i vücûddan pinhân olduğuna nâlân ü giryân ve ol vâris-i erîke-i Saltanat'ın kudûmüyle şâd u handân olup, nazm: E-mâ terâ'l-gayme ke'l-bâkî bi-edmaʿihi Ve'l-ardu tedhaku ke'l-cezlâni min ferahi mefhûmu ʿibret-güzînân-ı zemâneye nümâyân oldu. ʿAbd-i muhkar o Padişâh-ı devrânın zemân-ı saʿd-iktırânlarında Hâcelik ile çerâğ ve Peterburg'dan ʿavdetimde bi'l-vâsıta istintâk ve birkaç defʿa ʿatâyây-ı cezîle-i mülûkâneleriyle tahsîl-i vüsʿat-i ʿîş ü refâğ eylediğimden, “Hakk ʿalîm ü dânâdır ki, bu vakʿa-yı cân-sûzu yazar iken, nâvdân-ı sath-ı vücûd olan dü-çeşm-i hûn-âlûdüm mânend-i fevvâre feyezân ve sirişk-i dîde-i hasret-dîdem mânend-i nehr-i serîʿu's-seyelân cereyân eyledi”. Nazm: Ukallibu't-tarfe lâ-arzâ bi-medmaʿihi Hatta ta'asfara erdânî ʿalâmetühü Lâ-zâle yehmî ʿaleyhi külle zî cezülin Yüksi'r-riyâza deyâbîcâ kerâmetehü keder u sürûrdan mürekkeb işbu haber, Kāyim-makām Paşa tarafından Ordu-yi hümâyûn'a üç günde vürûd edüp, fi'l-hâl işâʿası lâzım gelenlere keyfiyyet, iʿlân ü işʿâr-ı cülûs-i hümâyûn zımnında serhadlere neşr-i ahbâr kılındı.