Düşmenin her tarafdan hücûmu sebebi ile gayret-keşân-ı dîn ü devlet şinâver-i bahr-i ʿamîk-ı fikret olup, her bâr mukābele tedârükünü mülâhaza ile şân ü übbehet-i devleti dâyimâ muhâfaza kaydına düşerek, sâl-i âtiyenin şimdiden tedârüküne mübâşeret ve Rumeli ve Anadolu eyâletleri kaviyyü'l-iktidâr bir Vezîr-i nâmdâra verilüp, mükemmel dâyireleri halkından başka, maʿiyyetlerine top ve yeniçeri ve sâyir ocağlardan mikdâr-ı vâfî asker ilhâk ve birine Sağ ve birine Sol Kol Serʿaskeri ıtlâk olunmak kezâlik talîʿa ve dümdârlık hidmetleri dahi birer vezîre tahsîs ve süvârî ocağları ile dâyireleri tahkîm ü tarsîs olunup, evvel-behârda Serʿaskerler birer cânibden [M2 278] Nehr-i Tuna'yı geçüp, ʿavn-i Kādir-i münaʿʿâm ile ahz-ı sâr u intikām etmek tertîbâtına şurûʿ u ihtimâm ve ihrâc-ı asker ve cemʿ-i zehâyir umûruna berçîde-i dâmen-i ıkdâm oldular.