Serdâr-ı ekrem hazretleri bâlâda ifâde olunduğu vech üzere, Vezîr ʿOsmân Paşa ve İbrâhîm Paşa ordularını teşrîf ile müşârun ileyhimâyı mazhar-ı iʿzâz ve bu imtiyâzdan Vezîr Ağa Paşa'ya dahi hisse-efrâz etmek içün evâhir-i cumâdelûlâda kapu halkı ile Yeniçeri ordusuna ʿazîmet ve Ağa Paşa'nın haymesine nüzûl ile müşârun ileyhi memnûn-i lutf u ʿinâyet edüp, birkaç sâʿat ikāmet ve hîn-i hareketlerinde müşârun ileyhi bir sevb ferve-i semmûr ile nüvâzende-i çeşm-i iʿtibâr ve ortalara ʿatâyây-ı vâfire bezl ü nisâr ile otaklarına tahrîk-i ʿinân-ı rehvâr eylediler. Teʿâkub-i eyyâm-ı esfâr ile zeʿâmet ve tîmârın ekseri nâ-ehil ve sıbyâna tevcîh olunarak, o makūlelere kıllet târî ve me'mûr oldukları mahallerde alay beylerinden gayri kimse bulunmayup, ekall-i kalîl neferleri dahi ʿadem-i idâre iktizâsıyla, mürtekib-i sefâlet-i hidmet-güzârî oldukları maʿlûm ve yoklanmaları resîde-i hayyiz-i lüzûm olup, Re'îsülküttâb ve Tevkīʿî ve Defter Emîni maʿrifetiyle defterlerine nazar ve nâmevcûdları mülâzım ve sefer eşmeğe muktedir kimselere tevcîh ile tahsîl-i esbâb-ı sefer kılındı. Abaza Mehmed Paşa Hazînedârı Feyzullah Ağa, paşası katl olundukdan sonra ihtiyâr-ı semt-i firâr ve Nasûh-oğlu yanına varup, muntazır-ı lutf-i Kird-gâr olmuşidi. Merkūmun derece-i şecâʿati maʿlûm ve istediği vakitde hayli âdem cemʿ edüp, Anadolu'ya velvele bırakacağı nezd-i Sadrıaʿzamî'de meczûm olup, dâyimâ bu fikr ile mütevehhım ve orduya bir-takrîb celb olunmasını kasd ü te'emmüm eder idi. Âhıru'l-emr orduda mevcûd merkūmun muʿtemedlerinden biri ihzârını iltizâm ve re'y-i mektûbu alup, tarafına irsâl ile o vahşî deşt-i nefreti râm edüp, orduya geldikde taraf-ı Sadâret-penâhî'den sunûf-i ikrâm hakkında erzânî ve çok geçmeden nâyil-i rütbe-i Mîr-i mîrânî olarak, kâffe-i umûru tehvîn ve Tutrakan'a muhâfız taʿyîn olundu. ʿAvdet-i harb ihtimâliyle Ordu-yi hümâyûn hazînesinde vücûd-i meblağ ehem olduğu maʿlûm-i Şehriyâr-ı İskender-hadem olduğuna binâ'en, birbirini velî ve teʿâkub ederek iki bin beş yüz kîse mikdârı mebâliğ hazîneye vâsıl ve dağdağa-i zarûret [M2 234] bu takrîb ile müntefî vü zâyil oldu.