Bir sene kadar mesned-i Sadâret'e şeref-bahş olan Mehmed Murâd Efendi maʿzûl ve şehr-i rebîʿulâhırın ikinci günü sâbıkā İstanbul Kadısı ʿAtıf Mehmed Emîn Efendi, o mesned-i bülende menkül oldu. Edirne Kazası, İzmir'den munfasıl Evliyâ-zâde Zeynelʿâbidîn Efendi'ye, gurre-i recebden ve Edirne Pâyesi'yle Mısr-ı Kāhire, Kuds-i Şerîf'den münʿazil Tarsûsî-zâde Mustafa Efendi'ye gurre-i ramazândan tevcîh u ihsân olunup, sâbıkā Edirne Kadısı es-Seyyid Mehmed Gānim Efendi'ye sene-i merkūme rebîʿulevveli gurresinden ve Edirne Pâyesi'yle, sâbıkā Şâm Kadısı olan Müftî-zâde Ahmed Efendi'ye seksen beş senesi muharreminin onuncu gününden Mekke-i mükerreme pâyeleri verilüp, bu mülâbese ile mahsûd-i akrân ve mağbût-i emsâl ü ahdân oldular. Sâbıkā Rumeli Kadıʿaskeri ve hâlâ Nakībuleşrâf ve Re'îsü'l-ʿulemâ olan Şeyhulislâm es-Seyyid Mustafa Efendi-zâde es-Seyyid ʿAbdullah Efendi nâvek-i ecel-i nâgeh-res ile matʿûn ve rebîʿulâhırın yirmi sekizinci günü masrûʿ-i ser-pençe-i raybü'l-menûn olup, mansıb-ı eşref-i nekābetle sâbıkā İstanbul Kadısı es-Seyyid İbrâhîm Efendi memnûn oldu. Leff ü neşr-i müretteb üzere Burusa ve Yenişehir ve yine Burusa'dan maʿzûl ʿAbdulvehhâb Efendi ve ʿArab-zâde ʿAli Rıza Efendi ve Murâd-zâde es-Seyyid Ahmed Efendi müteʿâkiben terk-i hayât-ı müsteʿâr ve ihtiyâr-ı dârü'l-hulûdi ve'l-karâr eylediler. Rumeli Kadıʿaskeri Şerîf-zâde Mehmed Şerîf Efendi müddet-i ʿörfiyyesin ikmâl ve Sadâret-i Anadolu'dan maʿzûl Sâlih-zâde Mehmed Emîn Efendi ramazân-ı şerîf evâsıtında o mansıb-ı ʿazîzü'l-menâl ile tahsîl-i derecât-ı ʿizz u ikbâl eyledi.