Vezâret'le bi'l-fiʿl Yeniçeri Ağası olan Süleyman Paşa'nın nüfûz-i kelâmı zâyil ve ru'yet-i umûrdan gāfil olduğuna binâ'en, Ocâğ-ı ʿâmire umûru merkez-i aslîsinden ʿâtıl olup, ortalar karakollukçulardan ʿibâret ve aldıkları taʿyînât hâric-i kudret-i Devlet olduğundan başka, İbrâ'îl vakʿasında bin nefer-i imdâd fermân olundukda, temâmen irsâlini ihbâr u tahkīk olundukda, ancak üç yüz nefer tedârük edebildiği âşikâr ve bâ-husûs kısteyn mevâcibinden kîseleri refʿa âdem bulamayup, Babadağı halkından [M2 68] istimdâd ve bu esbâb ile tenfîr-i tabʿ-ı Sadr-ı vâlâ-nijâd edüp, hulâsa müşârun ileyhin feyâlet ü re'y ü tedbîri ve zabt-ı askerîde olan rehâvet ü taksîri ʿazlini îcâb ve bu husûs etrâfıyla ʿarz-ı Rikâb-ı müstetâb kılınup, âharının nasbına ruhsat iktisâb olunduğuna binâ'en, Vidin Muâfızı olup, sâbıkā Yeniçeri Ağası olan Kapukıran Vezîr Mehmed Paşa kānûn-i Ocağa vâkıf ve dirâyet ve hüsn-i idâre ile muttasıf olduğundan, Kırım Serʿasker'liği ʿunvânıyla orduya ihzâr ve Yeniçeri Ağalığı ile kâm-kâr kılınup, selefi Kili Muhâfazası'na me'mûr olmuşiken, Hanya Mutasarrıfı'nın vefâtı haberi vürûduna binâ'en mansıb-ı mezkûr ile mesrûr kılınup, Vidin Muhâfızlığı dahi sâbıkā Haleb Vâlîsi Vezîr Mehmed Paşa'ya ihsân ve bir ân akdem muhâfaza-i kalʿaya şitâbân olması bâbında tarafına hıtâben ısdâr-ı fermân-ı celîlü'ş-şân kılındı.