Müşârun ileyh on bir mâh kadar yarlığ-i fermây-ı iklîm-i Kırım olup, ʿazline dek mücevherât ve tirkeş-behâ ve sâyir ʿatâyâ olarak altı bin kîse kadar nefʿ-i ʿazîm müşâhadesiyle mes’ûlât-ı tâkat-güdâzına her bâr müsâʿade olunmuşiken, şâyân-ı tahsîn ve sebeb-i âferîn olur tarafından bir hıdmet meşhûd olmadığından başka, inkıtâʿ-ı cisr hengâmında Turla'nın karşu tarafından berüye ʿubûr eden ehl-i İslâm'a gereği gibi muʿâvenet etmeyüp, şinâverlik ile meşhûr olan Tatarlar ceyb ü hemyânlarında nakid bulunan muvahhidîni imrâr ve nukūdu bulunmayanları terk ile sebeb-i gark-ı nüfûs-i bî-şümâr olduklarını menʿ ü tahzîrden rû-pûş ve düşmen, tefrika-i asâkirden üç beş gün sonra Hotin tarafına geçüp, hafîfü'l-me’ûne olan Tatar leşkeriyle Hotin etrâfında irâ’e-i sevâd-ı cüyûş etmek lâzım gelse idi, düşmen berü tarafa giçmemek ihtimâlini baʿzı nâs tefevvüh ve müşârun ileyh ise Serdâr-ı ekrem hareket etdiği gibi Yaş tarafına teveccüh edüp, aʿdâ dahi bî-bâk ü pervâ Turla'yı berü geçüp, Boğdan ve Eflâk taraflarını zabt u yağmâ ve katanalarını etrâfa havâle ile envâʿ-ı mefsedet icrâ edüp, cübn ü rehâvetinden nâşî düşmenin katana ve kazaklarına siper-keş-i mümânaʿat olarak bir mahalde ibrâz-ı celâdet eylemediği maʿlûm-i Şehriyâr-ı gayret-şiʿâr olmağla, ʿazline irâde-i ʿaliyye teʿalluk ve Selîm Girây Hân-zâde Kaplan Girây Hân mesned-i Hânî'ye tefavvuk edüp, çiftliğinden nehzat ve Muʿasker-i hümâyûn'a ilkāy-ı raht eyleyeceği haberi maʿlûm-i Sadr-ı vâlâ-menkabet oldukda, bi'n-nefs ricâl-i Devlet ile yemeklik yerinde icrây-ı resm-i istikbâl ve istifsâr-ı çi-gûnegî-yi hâlden sonra Babadağı'na sevk-i yek-rân-ı ikbâl ve ber-mûceb-i teşrîfât-ı hümâyûn haklarında lâzım gelen rusûm-i ʿâdiye ikmâl olunup, Zilkaʿdenin beşinci günü İsmâʿîl üzerinden Kavşan'a revâne ve selefi dahi Kıbrıs Cezîresi'ne menfiyyen tahrîk-i tâziyâne ile ʿibret-i bî-nâmûsân-ı zemâne oldu.