Müşârun ileyh sâdık ve gayret-keş-i dîn ve fart-ı şecâʿatla dil-rübûde-i zümre-i muvahhidîn, sehâveti fevka'l-had ve ikdâm ü himmeti müsellem-i erbâb-ı kabûl ü red olup, ancak fesâd-ı tabâyiʿ-i ecnâd ve ru'esâ beyninde mütemerrin olan ʿadem-i tevâfuk ve ittihâd sebebleriyle her ne kadar saʿy ü tedbîr ve igrâ vü teşvîk zımnında her çend bezl ü tebzîr etdiyse dahi muvâfık-ı mecrây-ı takdîr [M2 58] olmayup, hasm-ı ʿanîd memâlik-i Sultânî'ye kilîd olan Hotin gibi bir hısn-ı müşeyyedi zabt ü istîlâdan katʿ-ı nazar Tuna sevâhiline resîde ve yemîn ü yesârda vâkiʿ kurâ ve kasabât ehâlîsini gāret ü remîde edüp, müşârun ileyhin bu bevâʿis ile nüfûz ü iʿtibârına halel ve bundan sonra fetk u ratk-ı umûr ve tanzîm-i ahvâl cumhûra yaramayacağı maʿlûm-i ashâb-ı ʿakd ü hal olmağla, beş mâh kadar Sadr-ı devletde hezâr mihen ü meşâkk ile evkāt-güzâr oldukdan sonra mühr-i Vezâret işbu şaʿbânu'l-muʿazzamın on üçüncü günü Kapucu-başı Çerkes Bey mübâşiriyyeti ile yedinden nezʿ u istirdâd olunup, bundan evvel rütbe-i Vezâret ile kâm-yâb olan ʿIvaz Paşa-zâde Halîl Paşa'ya teslîm ile vedîʿa-i kûze-i hâfızası kılınan vesâyây-ı Şâhâne'yi şifâhen müşârun ileyh hazretlerine ifâde vü tefhîm eyledi. Hayri Efendi'nin ʿarz etdiği Sadâret-i târîhidir: Mü'ebbed eyleye Mevlâ Halîl Paşa'yı (مؤبد ايليه مولی خلیل پاشای) Enverî Efendi'nin dahi verdiği târihdir: Harf-i mücevher ile bir hoşca düşdü târîh, Hak bu ki, verdi revnak Sadr'a Halîl Paşa. (حق بو که وردی رونق صدره خلیل پاشا) Sadrıaʿzam ve Serdâr-ı ekrem hazretleri Babadağı meştâsına duhûl ile tensîk-i şevârid-i ahvâl-i Devlet'e meşgûl olup, Anadolu ve Trabzon eyâletlerinin sâl-i âtiyede Kırım tarafına taʿyîn olunması zarûriyyât-ı vakt îcâb eylediğinden, Anadolu Eyâleti sâbıkā Erzurum Vâlîsi olup, Kırım Serʿaskeri nasb olunan Silahdâr İbrâhîm Paşa'ya ve Kars ve Çıldır etrâfını muhâfaza şartıyla Erzurum Eyâleti dahi Maʿdenler Emîni ve Malatya Sancağı Mutasarrıfı Vezîr Hâfız Mustafa Paşa'ya ve iki bin nefer süvâriyle evvelbehârda Muʿasker-i hümâyûn'da isbât-ı vücûd etmek şartıyla Marʿaş Eyâleti Hamevîzâde Ahmed Paşa'nın mahdûmu ʿÖmer Bey'e ve Haleb Eyâleti, sâbıkā Selânik Mutasarrıfı Ahmed Paşa-zâde Vezîr Mehmed Paşa'ya ve Rumeli Eyâleti, Boğdan Serʿaskeri Vezîr ʿAbdî Paşa'ya ve Özi Eyâleti, Vezîr Hazînedâr ʿAli Paşa'ya ve Eyâlet-i Karaman, Canikli Süleyman Paşa'ya ve Selânik ve Kavala sancakları, Derbendler Başbuğu olan Vezîr ʿAli Paşa'ya ve Üsküb Sancağı, İskenderiyye Mutasarrıfı pederi Mehmed Paşa'nın göndereceği askerden mâʿadâ iki yüz [M2 59] nefer ile Ordu-yi hümâyûn'a gelmek şartıyla bâ-rütbe-i Mîr-i mîrânî Mustafa Bey'e ve Kilis ve Aʿzâz sancakları ilhâkıyla Rakka Vâlîsi Vezîr Mehmed Paşa'ya Bender Serʿaskerliği tevcîh ve selefi Aydın Muhassılı Kethudâ Mustafa Paşa'nın Kili muhâfazasına ʿazîmeti ve baʿzı mîr-i mîrân Tuna üzerine nasb olunacak cisrin berü ve öte yakalarına taʿyîn ve Topçu-başı Hezârfen Mustafa Ağa bâliğ-i derece-i sinn sebʿîn olup, pîr ü nâ-tüvân ve şedâyid-i seferiyyeye tâb-âver olamayacağı nümâyân olduğundan ʿazl ve yerine Âsitâne'de vekîl olan Kapucu-başı Mehmed Emîn Ağa nakl olundu.