ʿAdem-i sebât-ı askerîyle düşmen Kalas Karyesi'ni zabt etdikden sonra Tomarova tarafına ʿazîmet ve o havâlîde olan enbârlardan ecnâs-ı zehâyir nakline mübâşeret eylediği derece-i tevâtüre resâ ve defʿ-i gezend-i aʿdâ şiddet-i şitâ hasebiyle mümkin olmayup, min kıbeli'r-Rahmân kulûb-i müslîmînde havf ü vecel ve bîm ü feşil dahi hüveydâ olmağla, bu ahvâl-i pür-ehvâl Sadr-ı gayret-iştimâli muzdaribü'l-bâl etmişiken, İsakçı'da Anbar Emîni olan Kapucu-başı Dağıstânî ʿAlî Ağa yirmişer otuzar guruş bahşîş ile kırk elli âdem tedârük ve karşu tarafa ʿubûr husûsunda izhâr-ı rağbet ü tehâlük etmekle, mûmâ ileyhe Sadrıaʿzam tarafından kemâ-yenbağî ruhsat ve İsmâʿîl Kasabası'nda ikāmet üzere olan İskenderiyyeli Mustafa Bey dahi maʿiyyetine taʿyîn olunup, re'yine mutâvaʿat tarafına işâret olunmuş idi. Ağa-yı mûmâ ileyh mîr-i merkūmun vürûduna bakmayup, müstaʿînen billâh enbârlardan zehâyir nakline taʿyîn olununan müşrikîn üzerine sell-i seyf ve tehzîz-i sinân ve ekserîsini hûn-i sürh-gûn-i merg ü helâke galtân edüp, bu hareket-i cemîle dikkat olunsa te'yîd-i maʿnây-ı, “kem min fi’etin kalîletin” eylediği nümâyân ve düşmen-i bed-peymân bu asker-i endek-şümârı talîʿa-i ceyş-i mevfûr ve ʿadem-i mübâlât ile hücûmlarını o maʿnâya maksûr ederek tahlîs-i cân sevdâsıyla gürîzân oldular. [M2 57] O hılâlde İskenderiyyeli Mustafa Bey dahi askeriyle vârid olup, İbrâ'îl Muhâfızı Vezîr ʿAbdî Paşa kapusu halkı ve sevâhilden cemʿ etdiği asâkir-i vâfire ile Kalas kurbunda vâkîʿ bir karyede tehaşşüd eden düşmen üzerine hareket etdiğini mûmâ ileyhimâ istihbâr edüp, intizâr-ı tekarrub ile bunlar dahi bir tarafdan düşme- ne iztırâb vermeğe te'ehhüb etmişler iken nâ-gâh âvâze-i top ʿâlem-gîr ve velvele-i dâr u gîr felek-mesîr olup, istidlâl-i muhârebe vü musâdeme ile mûmâ ileyhimâ bi'l-ittifâk Kalas Karyesi'ne duhûl ve muhâceme edüp, derûnunda olan düşmen ekall-i kalîl olmağla, savlet-i İslâmiyân'dan zehre-tirâk ve ekserîsi dâhil-i hufra-i helâk olup, bu haber-i melâlet-eser vezîr-i müşârun ileyh ile muhârebe eden küştenîlerin, gûş-i gaflet-pûşlarına güzer eyledikde, reh-peymâ-yı semt-i meferr ve ekserîsi şemşîr-i tîz-i İslâm ile ʿâzim-i dereke-i sekar olup, iki asker birbiriyle mülâkāt ve bu ʿatıyye-i Mevle'l-mevâliyye hamd-i bî-gāyât eylediler. Düşmen-i dînin kasaba-i mezkûrede tekrar tehassun eylemesi melhûz-i asker-i zafer-eser olduğundan mahall-i merkūmu ihrâk u tahrîb ile hâke berâber eyledikleri haberi Ordu-yi hümâyûn'a vâsıl ve kulûb-i müslimînde sunûf-i meserret hâsıl olup, müşârun ileyhin işbu hengâm-ı ʿibret-nümâda zuhûra gelen ikdâm ü gayreti sebeb-i takviyyet-i kulûb-i İslâm ve bâʿis-i halecân-ı aʿdây-ı li'âm olup, saʿyı meşkûr ve hıdmeti mebrûr olduğundan gayri hakkında yemm-i mekârim-i Şâhâne mevc-endâz-ı zuhûr ve Boğdan Serʿaskerliği ʿunvânıyla mültefet ü manzûr olup, şimdilik yirmi beş bin guruş nakd ve mikdâr-ı kifâye çelenk tarafına irsâl ve Kethudâsı Mîr-i mîrânlık ve Dîvân Kâtibi Hâcelik rütbelerini ihrâz ile mecbûru'l-hâtır ve makziyyu'l-âmâl kılındılar.