Hasm-ı mekkâr Leh memleketinde cemʿ u tertîb etdiği küffâr ile şehr-i rebîʿulevvelin ikinci günü Hotin'e sekiz sâʿat buʿdu olan Goroki (قوروکه) nâm maʿberden köprüsünü kurup, berü tarafa güzâr etdiğini ve Hotin Kalʿası'na zahîre ile imdâd ve Serʿasker ordusuna mühimmât ve asker ve cebehâne ile muʿâvenet olunup, mukābeleye istiʿdâd verilmek husûsunu Serʿasker Paşa ve mukaddemâ o tarafa me'mûr İslâm Girây Sultân tahrîr u ihbâr eylediklerine binâ'en, vücûh-i Ordu-yi hümâyûn Kethudâ Bey çadırında ictimâʿ ve mefhûm-i kā'imeye cümlesi kesb-i ıttılâʿ edüp, Kırım Hânı'nın mukaddemâ İlsavat tarafına tasmîm olunan me'mûriyyeti fesh olunmaksızın Nûreddîn Sultân'ın mikdâr-ı vâfî Tatâr ile o tarafa me'mûriyyeti ve yâhûd tertîb-i âhar ile imdâd ü iʿâne olunmak bahsi dermeyân ve emreynin biri tercîh olunamayup, bi'l-âhıra Hân-ı ʿâlişân ile müzâkere ve mücâvebe olunmak istihsân olunmağla emr-i mezbûru şifâhen müzâkere ve haberini îsâl etmek üzere Sadriazam Mektûbçusu Süleymân Feyzî Efendi Kavşan'a irsâl olunmuşidi. Ordu-yi hümâyûn'a gelen tahrîrâtı mûmâ ileyh Kırım Hânı'na takdîm ve ne gûne tedbîr muktezî olduğunu istikşâf ile Nureddîn Sultân'ın taʿyîn olunmasını tefhîm eyledikde, Sultân'ın bu mâdde dâyire-i istitâʿatından hâric olup, bi'n-nefs kendüsünün hareketi lâzım geldiğini ve Tatar tâyifesi top ve humbaraya tâb-âver olmayup, maʿiyyetine lüzûmu kadar ʿOsmânlu askerinin me'mûriyyetini ve Hân-tepesi'nde olan anbarlar ve Yaş Kasabası muhâfaza olunmak husûslarını ifâde ve bu cevâb ile mûmâ ileyhi iʿâde etmişidi. Mâh-ı merkūmun sekizinci günü ʿumûm meşvereti tertîb ve Bender ihtiyârlarından birkaç kimse meclise idhâl ile usûl-i maslahat cümle muvâcehesinde tefrîʿ ve tebvîb olundukda, Hân cenâbının serhadlerin aʿzamı olan Bender ve Özi kalʿalarını terk ile Hotin'e teveccühü her çend münâsib değil ise dahi bu bâbda re'y u irâdelerine muvâfakāt, mûcibât-ı maslahatdan olup bi'n-nefs ʿazîmetlerini ehl-i şûrâ [M2 22] vücûd-i mahzûr ile maʿkūl görüp, ancak: “Bu tarafları muhâfaza içün Nureddîn Sultân'ın Kavşan nâm mahalde darb-ı hıyâm-ı ârâm eylemesi lâzımdır” deyü huzzâr-ı meclis ıtlâk-ı zimâm-ı kelâm etmeleriyle, Hân-ı müşârun ileyhin me'mûriyyeti zımnında iktizâ eden nâme-i hümâyûn ve hulâsa-i ârâ’-i ehl-i meşvereti mutazammın tahrîrât, taraf-ı Serdâr-ı ekremî'den ibʿâs ve harekete tergīb ü ihsâs olundu. Bundan sonra Hân maʿiyyetine Diyârbekir Vâlîsi Vezîr Mehmed Emîn Paşa ve Yeniçeri Ocağı'ndan on beş bin süvârî ile yirmi bin piyâde ve müstevfâ top ve barut ve sâyir eşyâ tertîb ve firistâde ve anbarlar muhâfazasına dahi asker taʿyîn olunup, mukaddemâ iki bin Arnabûd ile Ordu-yi hümâyûn'a vârid Mîr-i mîrân'dan Ahmed Paşa-zâde Mehmed Paşa dahi Yaş Kasabası muhâfazasına me'mûr Vezîr ʿAli Paşa maʿiyyetine tesbîl ve hareketi taʿcîl olundu.