Cidde Vâlîsi Vezîr Râkım Mehmed Paşa'nın sinni-yi ömrü mütenâhiz-i râdde-i sebʿîn ve kıyâm u kuʿûdda muhtâc-ı muʿîn olduğundan gayri, hücûm-i ʿillet-i samem ile âvâre-i tabl u ʿalem ve ʿacz-âver-i dağdağa-i hayl ü haşem olduğuna binâʿen, bir mahalde ber-vech-i tekāʿüd-ikāmetini niyâz ve dakk-ı bâb-ı merhamet-i Şehriyâr-ı bende- nüvâz etmekle, mes'ûlü müsâʿadeye makrûn ve husûl-i merâmıyla memnûn olmuşidi. Münhal olan Cidde mansıbı, Sadr-ı esbak Vezîr Hâmid Hamza Paşa'ya ve Kandiye, Anabolu Muhâfızı Vezîr Hüseyin Paşa'ya ve Anabolu Muhâfızlığı, Sadr-ı esbak Muhsin-zâde Mehmed Paşa'ya tevcîh olundu. Râkım Paşa eğerçi husûl-i matlabı ile dilşâd ve gāyile-i Vezâret'den ser-âzâd oldu. Ancak, çok geçmeden fevt ve zâyık-i şerbet-i “Küllü nefsin zâ'ikatü'l-mevt” oldu. Rikâb-ı hümâyûn Defterdârı İbrâhîm Efendi pîr-i-kühen-sâl ve idâre-i umûr-i istîfâda ʿacz ü fütûru vâreste-i tafsîl u icmâl olup, mansıbı ile ʿÂtıf-zâde ʿÖmer Efendi bülend-iştihâr oldu.