Memâlik-i Gürcistan'da vâkiʿ baʿzı kılaʿ harâbe-müşrif olup, ta'mîri vü termîmi içün Çıldır Vâlîsi, Kethudâsını ve müteʿayyinân-ı memleketden baʿzı kimseleri o tarafa taʿyîn etmişidi. Me'mûrlar Bağdâdcık Kalʿası'na vardıklarında, mukaddemâ girîve-gerd-i vâdi-yi nifâk ve alem-efrâz-ı meydân-ı ʿisyân ü şikāk olan Salomon merkūmların yanına gelüp, eban ʿan-ceddin Devlet-i ʿaliyye'nin bendesi ve kerem ü ʿinâyetinin şermendesi olup, hakkında isnâd olunan töhmet Çıldır Vâlîsi maktül Vezîr Ahmed Paşa'nın nefsâniyyet ü siʿâyetinden neş'et eylediğini ifâde ile kemâ-kân Hükûmet-i Gürcistân ile mazhar-ı lutf u ihsân olmasını recâ ve eslâfı gününde cârî olduğu vech üzere beyʿ u şirây-ı üserâya mâniʿ olmayup herhâlde tahsîl-i rızâ eyeleyeceğini beyân ve inhâ ve Gürcistân reʿâyâsını idlâl ve efrenc-i âyînine idhâl kasd eden Katalkuz nâm râhib memleketden tard ve diyâr-ı baʿîdeye nefy olunup, Suyer (سویره) Kalʿası hedm ve yâhûd Devlet-i ʿaliyye tarafından muhâfaza olunmak ve yâhûd kendüye zabt etdirmek ve ihtilâl-i memleket hasebiyle reʿâyâ istîfây-ı dîne kudret-yâb olamayup, mürâbaha talebiyle dâyinler tarafından izʿâc olunmamak şurûtunu temhîd ve berât [M1 316] ʿubûdiyyetini tecdîd eylediğini me'mûrlar vezîr-i müşârun ileyhe işʿâr ve ol dahi cümle ile bu mâddeyi meşveret edüp, istisvâb-ı kelân-terân-ı memleket ile keyfiyyet Der-i devlet'e ʿarz u işâret olundukda, Suyer Kalʿası hedm ve râhib-i mesfûr Hısn-ı keyf Kalʿası'nda habs ve sâyir mes'ûlâtına müsâʿade ile kemâ-kân hâkim-i Gürcistân nasb olunup, yedine berât-ı ʿâlişân ihsân olundu.