Müşârun ileyh Şumnu meştâsında bir münâsebetle sebeb-i ʿazlini bu Fakîr'e takrîr ve bî-kem ü kâst ve sahîh u râst olarak işbu mecelleye meʾâl-i takrîri tastîr olundu. "Moskovlu'nun Leh memleketine duhûlleri Şehriyâr-ı ʿâkibet-bin ve Pâdişâh-ı İskender-temkîne bâʿis-i teşvîş ve etrâf dahi baʿzı mugālata ile sebeb-i tevhîş olduklarına binâʾen, defʿaten sefer kapularını açmak ve mechûlü'l-ʿâkıbe ve hatarı muhtemel fitne-i nâyime-i harbi uyandırmak mukaddimâtını temhîd etdikce, askerin metrûkiyyeti ve serhadlerin zehâyir ve mühimmâtdan huluvvu hasebiyle, ser-rişte-i mükâleme vü muhâbereyi tatvîl ve refte refte levâzım-ı harbi tekmîl etdikden sonra kuvvetlice bulunup, zarûret ilcâ eder ise, o zemân muhâbereye mübâşeret olunmak lâzımdır; zirâ serhadlerin hâli benim maʿlûmum ve Ordu-yi hümâyûn Tuna'ya varmadan aʿdâ o taraflara hücûm edüp, serhadlerde müdâfaʿaya vâfî asker olmayup, bir bâdire zuhûru meczûmdur” demişdim. “Kelâm-ı sadıkāneme havâle-i semʿ-i iʿtibâr olunmayup, kazâ vü kader dahi ihdâs-ı efâʿîl-i ʿacîbe ve tertîb-i esbâb-ı garîbe eyleyüp, ʿazlimizden sonra feth-i bâb-ı hısâm ve ilâ hâze'l-ân iʿmâl-i rimâh ü hısâm olunmakdadır" dedikde, Moskovlu'nun memâlik-i Devlet-i ʿaliyye'ye sû-i kasdı ve Leh ve Tâtâristân dağdağasını defʿa elli seneden berü tedârükü beyne'd-düvel şâyiʿ ve Petro dedikleri gebr-i hâlikin vasiyyet-nâmesinde bu mukaddimât münderic olduğu emr-i vâkiʿ iken, Moskovlu hasmına vakit kazandırmak ve askerine nizâm verüp, davrandırmak müstahîl görülür” dediğimde, fi'l-vâkiʿ benim dahi bu keyfiyyet tahkīkātımdandır, ancak düşmen fesh-i sulh mâddesini devlete isnâd içün tedrîcî maslahatına revâc vereceği ve ekalli bu mâdde bir sene süreceği ve bir senede Devlet-i ʿaliyye serhadlere müstevfâ asker taʿyîn ve mühimmât ve zehâyir teşhîn edüp, Ordu-yi hümâyûn varıncaya dek serhadlü düşmen ile cenge müstaʿid bulunurlar idi” deyü, teʾessüf-günân mâ-cerâyı beyân eyledi. Biz yine sadede gelelim. Şehr-i rebîʿulevvelin yirmi üçüncü günü müşârun ileyh devir kürkü teşekküriyçün fetvâ-penâh [M1 315] cenâblaryle Serây-ı hümâyûn'a ʿazîmetlerinde Silahdâr Ağa gelüp emâneti istirdâd ve bir hılâline vazʿ-ı yed olunmayup, Bozcaada'ya fekat ibʿâd olundu. Anadolu Vâlîsi Vezîr Hamza Paşa'nın istiʿdâd ü liyâkati ʿan-asl maʿlûm-i hümâyûn olduğundan, Vekâlet-i kübrâ ile ibcâl ve daʿveti mutazammın hatt-ı şerîf ile Silahdâr Ağa Kütahya cânibine irsâl olunup, Âsitâne'ye gelinceye dek Tevkīʿî Vezîr Mehmed Emîn Paşa'ya Kāyim-makāmlık tevcîhi, Sadâreti'ne berâʿatü'l-istihlâl oldu.