Şehr-i rebîʿulevvelin on ikinci günü de'b-i dîrîn ve resm-i pîşîn üzere Pâdişâh-ı cemm-i câh Sultân Ahmed Câmiʿ-i şerîfine ʿazîmet ve muntazır-ı kudûm-i Şâhâneleri olan bendegânı tahrîk âbrûy-i iltifâtlarıyle hâyiz-i rehîne-i meserret buyurup, mevlidhânlar kudüm-nâme-i hazret-i Fahru'l-enbiyâyı negamât-ı dil-dûz ve iscaʿ-ı şevki efrûz ile kırâʾet ve meşâyih-i ʿizâm dahi neşr-i revâyih-i vaʿz u nasîhat ile âlâne-i kulûb-i hâss u ʿâmm ve o meclis-i akdesi miskiyyü'l-hıtâm eyleyüp, Şehriyâr-ı enâm debdebe-i ʿizz ü ihtişâmlarıyla Serây-ı hümâyûnlarına ʿatf-ı zimâm buyurdular. Üsküdâr Kazâsı, sâbıkā Hekîmbaşı Mehmed ʿArif Efendi'ye ve Kuds-i şerîf Kazâsı Kahveci-zâde es-Seyyid Ahmed Efendi'ye, Mekke-i mükerreme Kazâsı Hayâtî-zâde Mehmed Saʿîd Efendi'ye, Medîne-i münevvere Kazâsı, Hafîd Mehmed Efendi'ye tevcîh ü ihsân ve yedlerine başka başka iʿtâ-yı emr-i celîlü'ş-şân kılındı. Anadolu Kadıaskeri Mehmed Sâlih Efendi-zâde Mehmed Emîn Efendi'nin müddet-i sadâreti on dört mâha resîde ve bu cihetle bisât-ı mansıbı pîçîde kılunup Sadâret-i Anadolu ile ʿAbdullah Efendi-zâde Mehmed Esʿad Efendi'nin rûy-i emeli handîde kılındı. Mâh-ı merkūmun on yedinci günü askerî tâyifesinin bir kıst mevâcibleri ihrâc ve kabzına meʾmûrlara [M1 314] iʿtâ ve râtibe-hârân-ı Devlet-i ebed bünyân bu cihetle, terfîh ü iğnâ olundu.