Vak'a-i Mısriyye'de terk-i kâr u bâr ve Gazze taraflarına firâr eden Şeyhu'l-beled-i sâbık Keşkeş Hüseyin Bey ve hevâdârı bulunan ser-geşteler ʿAli Bey'den intikām almak dâʿiyesiyle, bir mikdâr Mağribî asker tahrîr ve ʿAkka'da ser-nümây-ı bağy ü şekā olan Zahir ʿÖmer'den celb eyledikleri haşerât ile sevâd-ı cemʿiyyetlerin teksîr ve Gazze'den hareket ve Sâlihiyye nâm mahalde ʿAli Bey askerini ru’yet ve Dimyât tarafına berren ʿazîmet eylediklerini berü taraf askeri tahkīk u taʿkīb ve Keşkeş gerüye dönüp ʿAli Bey askerini istîsâl ve tenkîb edüp, Mısır'a firâr ve merkūm dahi askeriyle Dimyat'a duhûl ve aʿyân ü eşrâfını mukayyed ve mekbûl edüp, ahz ve emvâl ü eşyalarını ahz u tasarruf ve nehb ü gāretle izhâr-ı ânife ve tasalluf ettiğini ʿAli Bey Vâlî-yi Mısır'a ifade edüp, üzerlerine asker tertîbi karâr-dâde olmuşidi. Fi'l-hâl Ocağlu ve sâyirden cemm-i gafîr ve leşker-i kesîr tedârük ve Ebu'z-Zeheb Mehmed Bey askere Emîr nasb olunup, ʿAli Bey askeri vakt-i şâm mukābele-i husemâda nasb-ı hıyâm ve Keşkeş dahi: “Tagdü bi'l-ʿadüvvi kable en yete 'aşşâ bike” mefhûmunu mülâhaza ile aʿdâsı üzerine şebhûn ve bir lahzada hâllerini dîger-gûn edüp, ağırlık ve top ve mühimmatların zabt ve vâfirini silsile-i mezellete rabt ve bu rüsvâylık ile ʿAli Bey askeri Mısır'a ʿavdet ve Keşkeş dahi taʿkībe mübâderet ve vâlî buyuruldusuyla, meʾmûren muhâlifler cengine mübâşeretini işāʿa ile mâbeyne ilkāy-ı vahşet eylediğini Vezîr Râkım Paşa istimaʿ etdikde, hemân kapusu halkıyla ʿAzeb Kubbesi'ne nüzûl ve tertîb-i asker ile meşgûl olup, müddet-i yesîrede vâfir asker tertîb ü tahrîr ve Keşkeş Hüseyin Bey üzerine tesyîr eyledi. Bu hücûmdan vücûd-i Keşkeş lerzân ve mürtaʿiş olup, piyâde ve ağırlığını terk ve Saʿîd cânibine firâr ve bunlar dahi, taʿkībe ibtidâr ve yetişüp Keşkeş Hüseyin Bey'i ve Sekrân Halîl Bey'i ve sâyirlerini katl ve irâde-i vâlî üzere sâbık Şeyhu'l-beled Halîl Bey ve iki nefer çirâğları âsûde-i şemşîr-i hûnbâr olup, Kıbrıs'a nefy [M1 309] ü tagrîbleriyle iktifâ ve sâyirlerinin ru’ûs-i maktuʿaları Âsitâne'ye gönderilüp, târîh-i mezkûrda ʿibret-gâh-ı erbâb-ı şekāya ilkā olundu.